पॅरिस : भारत आता केवळ जगातील तांत्रिक आणि आर्थिक उपायांचा ग्राहक राहिलेला नाही, तर अनेक जागतिक समस्यांवर उपाय सुचवणारा आणि त्यात योगदान देणारा देश बनला आहे असे प्रतिपादन पंतप्रधान नरेंद्र मोदी यांनी येथे रविवारी केले.
फ्रान्समधील भूमध्य समुद्रकिनारी असलेल्या नीस येथे आयोजित भारत इनोव्हेट्स २०२६ या कार्यक्रमाच्या उद्घाटनावेळी, फ्रान्सचे राष्ट्राध्यक्ष मॅक्रॉन यांच्या उपस्थितीत मोदी बोलत होते. मोदी म्हणाले की, भारतातील तरुण संशोधक आणि उद्योजक मानवजातीच्या हितासाठी उपयुक्त ठरणारे उपाय विकसित करत आहेत. दहा वर्षांपूर्वी जग भारताकडे तंत्रज्ञान स्वीकारणारा देश म्हणून पाहत होते. पण, आज भारत तंत्रज्ञान पुरविणारा देश म्हणून उदयास येत आहे. या पार्श्वभूमीवर भारत इनोव्हेट्स हा भारतासोबत जागतिक नवोन्मेषाचा पुढचा अध्याय लिहिण्यासाठी जगाला दिलेला खुले निमंत्रण आहे असे मोदी म्हणाले.
मोदींनी उच्च तंत्रज्ञान, संरक्षण, संशोधन आणि नवोन्मेष क्षेत्रांमध्ये सरकारने केलेल्या सुधारणांचा उल्लेख केला. त्यांनी सांगितले की, भारताची रिफॉर्म एक्स्प्रेस थांबणार नाही; ती पुढेही वेगाने धावत राहील. भारत-फ्रान्स संबंधांवर मोदी म्हणाले की, भारत आणि फ्रान्स यांच्यातील सहकार्य हे केवळ राजनैतिक संबंधापुरते मर्यादित नाही; तर ते विश्वास, नवोन्मेष, प्रेरणा व सामायिक दृष्टिकोनावर आधारित आहेत.
मॅक्रॉन यांची मेक इन इंडिया उपक्रमाला दाद
आपल्या भाषणात मॅक्रॉन यांनी मेक इन इंडिया या उपक्रमाचे कौतुक करत फ्रान्सने विविध क्षेत्रांत त्यात सहभाग घेतल्याचे सांगितले. त्यांनी भारताचे वर्णन नवोन्मेषाचा देश असे करत कृत्रिम बुद्धिमत्ता, हवामान बदल आणि अत्याधुनिक तंत्रज्ञान क्षेत्रांत भारत-फ्रान्स सहकार्य अधिक विस्तारण्याची गरज व्यक्त केली. तसेच नागरी अणुऊर्जा क्षेत्रात, विशेषत: लघु मॉड्युलर अणुभट्टया या क्षेत्रात दोन्ही देशांमध्ये सहकार्य वाढवण्याच्या मोठ्या संधी असल्याचे त्यांनी नमूद केले.
भारत इनोव्हेट्स २०२६ म्हणजे काय?
भारत सरकारचा प्रमुख जागतिक नवोन्मेष उपक्रम, डीप-टेक स्टार्टअप्स आणि संशोधन प्रकल्पांना आंतरराष्ट्रीय व्यासपीठ, भारत, फ्रान्स आणि इतर देशांतील स्टार्टअप्स व गुंतवणूकदारांचा सहभाग.
