वॉशिंग्टन : गेल्या ब-याच काळापासून प्रलंबित असलेला अमेरिका आणि भारत यांच्यातील व्यापार करार पुन्हा चर्चेत आला आहे. ट्रम्प यांनी दोन्ही देशातील करार लवकर होण्याची आशा व्यक्त करताना एक विधान केले आहे, ज्याने सगळ्यांचे लक्ष वेधून घेतले आहे. ट्रम्प म्हाले की भारताने अनेक वर्ष अमेरिकेचा फायदा घेतला आहे. आता परिस्थिती उलट झाली आहे. अमेरिका भारताकडून खूप पैसे कमावत आहे आहेत.
व्हाईट हाऊसमध्ये झालेल्या पत्रकार परिषदेत बोलताना डोनाल्ड ट्रम्प यांनी हे विधान केले आहे. भारतावरील टॅरिफबद्दलही ट्रम्प यांनी भाष्य केले आहे.
डोनाल्ड ट्रम्प म्हणाले की मी त्यांना (भारत) दोष देत नाही. माझ्या लोकांना देतो, कारण आपण मूर्ख होतो. अनेक वर्षे भारताने अमेरिकेचा फायदा घेतला. त्यांनी आपल्यावर (अमेरिकेवर) खूप जास्त कर (टॅरिफ) लावला आणि स्वत: मात्र काहीच दिला नाही. आता परिस्थिती बरोबर उलटी झाली आहे आणि आम्ही (अमेरिका) भारताकडून प्रचंड पैसा कमावत आहोत. पण, आम्ही एका करारावर पोहोचू. कारण मला तुमचे पंतप्रधान नरेंद्र मोदी खूप आवडतात. ते माझे चांगले मित्र आहेत आणि आम्ही भेटत असतो. आमच्यातील मैत्रीचे नाते खूप चांगले आहे असे विधान डोनाल्ड ट्रम्प यांनी केले.
नवीन टॅरिफ लावण्याची तयारी
अमेरिकेमध्ये भारतासह अनेक देशांवर अतिरिक्त टॅरिफ लावण्याचा प्रस्ताव आणण्यात आला आहे. १० ते १२.५ टक्के नवी टॅरिफ लावला जाऊ शकतो. भारतासह ६० देशातून येणा-या वस्तू आणि सामान हे जबरदस्ती मजुरी करून बनवण्यात येते असा दावा अमेरिकेन सरकारने केला असून, त्यामुळेच हा टॅरिफ लावण्याच्या हालचाली सुरू आहेत. अमेरिकेच्या व्यापार प्रतिनिधी कार्यालयाने एक ५४ देशांची यादीही प्रसिद्ध केली आहे. या यादीत भारताचाही समावेश आहे. मजुरांचे शोषण करून वस्तू, साहित्य उत्पादन करण्याविरोधातील कायद्यांची या देशांमध्ये नीटपणे अमलबजावणी केली जात नाही, असे अमेरिकेचे म्हणणे आहे.
