नवी दिल्ली: आयपीएल २०२६ चा हंगाम राजस्थान रॉयल्सच्या १५ वर्षीय युवा फलंदाज वैभव सूर्यवंशी साठी अविस्मरणीय ठरला आहे. या हंगामात वैभवने आपल्या फलंदाजीने क्रिकेट विश्वात एक नवीन अध्याय लिहिला असून, अनेक दिग्गज खेळाडूंचे विक्रम मोडीत काढले आहेत.
बाउंड्रीचा नवा ‘वर्ल्ड रेकॉर्ड’
राजस्थान रॉयल्सचे आव्हान जरी आयपीएलच्या क्वालिफायर-२ मध्ये गुजरात टायटन्सविरुद्ध संपुष्टात आले असले, तरी त्या सामन्यातही वैभवने आपल्या फलंदाजीची चमक दाखवली. त्याने ९६ धावांची धडाकेबाज खेळी करत या हंगामात तिसऱ्यांदा शतकाजवळ जाऊनही हुलकावणी दिली. या खेळीदरम्यान त्याने ८ चौकार आणि ७ गगनचुंबी षटकार लगावले. यासह, आयपीएल २०२६ मध्ये त्याच्या नावावर १३५ बाउंड्री (६३ चौकार आणि ७२ षटकार) जमा झाल्या. एका टी-२० सीझनमध्ये सर्वाधिक बाउंड्री मारण्याचा हा नवा विश्वविक्रम आहे. यापूर्वी हा विक्रम इंग्लंडचा माजी कर्णधार जोस बटलरच्या नावावर होता, ज्याने २०२२ च्या आयपीएलमध्ये १२८ बाउंड्री लगावत विक्रम प्रस्थापित केला होता.
| खेळाडू | बाउंड्री (चौकार + षटकार) | वर्ष |
| वैभव सूर्यवंशी | १३५ (६३+७२) | २०२६ |
| जोस बटलर | १२८ (८३+४५) | २०२२ |
| विराट कोहली | १२१ (८३+३८) | २०१६ |
| डेव्हिड वॉर्नर | ११९ (८८+३१) | २०१६ |
| शुभमन गिल | ११८ (८५+३३) | २०२३ |
सर्वाधिक धावा करणाऱ्या खेळाडूंच्या यादीत स्थान
केवळ बाउंड्रीच नव्हे, तर धावांच्या बाबतीतही वैभवने कहर केला आहे. या हंगामात १६ सामन्यांत ७७६ धावा करत, तो एका आयपीएल सीझनमध्ये सर्वाधिक धावा करणारा पाचवा फलंदाज ठरला आहे. या यादीत त्याच्यासोबत विराट कोहली, शुभमन गिल, डेव्हिड वॉर्नर आणि जोस बटलर यांसारख्या दिग्गज खेळाडूंचा समावेश आहे.वैभवची ही कामगिरी भारतीय क्रिकेटसाठी भविष्यातील एक मोठी आशा मानली जात आहे. १५ व्या वर्षीच अशा प्रकारचा दबदबा निर्माण करून त्याने सिद्ध केले आहे की, तो येणाऱ्या काळात क्रिकेटच्या मैदानात अनेक मोठे विक्रम आपल्या नावावर करेल.
