तेहरान: मध्य पूर्वेतील तणाव शिगेला पोहोचला असून इराणने अमेरिकेच्या लष्करी तळांवर मोठा प्रतिहल्ला केला आहे. इराणची गुप्तचर संस्था आणि लष्कराचा मुख्य भाग असलेल्या इस्लामिक रिव्होल्युशनरी गार्ड कॉर्प्सने (IRGC) हा दावा केला आहे. इराणच्या क्षेपणास्त्र आणि ड्रोन हल्ल्यात अमेरिकेचे तब्बल ८ लष्करी तळ उद्ध्वस्त झाले आहेत. हा हल्ला प्रामुख्याने कुवेत आणि बहरीनमध्ये असलेल्या अमेरिकेच्या लष्करी तळांवर आणि नौदलाच्या ‘फिफ्थ फ्लिट’ (Fifth Fleet) या विभागावर करण्यात आला.
अमेरिकेने काही काळापूर्वी इराणच्या किनारपट्टीवरील ५ चौक्यांना लक्ष्य केले होते. त्याचाच बदला म्हणून हा भीषण हल्ला करण्यात आल्याचे इराणने स्पष्ट केले आहे. अमेरिकेने युद्धविराम कराराचे उल्लंघन केल्याचा आरोपही इराणकडून करण्यात आला. हॉर्मुझ जलडमरू (Strait of Hormuz) परिसरातील सुरक्षा आणि वाहतूक व्यवस्था ही संपूर्णपणे इराणच्या नियंत्रणात असून, अमेरिकेने या नियमांचे उल्लंघन करून प्रक्षोभक कारवाई केली होती, असा दावा इराणच्या परराष्ट्र मंत्रालयाने केला आहे.
इराणच्या या प्रतिहल्ल्यात अमेरिकेचे अब्जावधी डॉलर्सचे नुकसान झाले असून, सुरक्षेच्या कारणास्तव अमेरिकेने या नुकसानीची उपग्रह चित्रे (Satellite Images) जारी करण्यास मनाई केली आहे. इराणचे परराष्ट्र मंत्री अब्बास अराक्ची यांनी वॉशिंग्टनला चेतावणी दिली आहे की, जर अमेरिकेने पुन्हा अशी कोणतीही लष्करी आगळीक केली, तर यापेक्षाही मोठा आणि तीव्र हल्ला केला जाईल. तसेच अमेरिकेने स्वतःच्या सुरक्षेसाठी या संपूर्ण क्षेत्रातून आपले सैन्य मागे घ्यावे, असा इशाराही त्यांनी दिला आहे. या ताज्या हल्ल्यामुळे संपूर्ण आखाती देशांमध्ये युद्धाचे ढग गडद झाले असून परिस्थिती गंभीर बनली आहे.
