सोलापूर: सोलापूर शहरातील गजबजलेल्या जुनी मिल कंपाऊंड परिसरात सोमवारी दुपारी एक काळजाचा थरकाप उडवणारी घटना घडली. एअरगनसाठी लागणारे साहित्य आणि गंधकाचे बॉक्स गाडीत भरत असताना अचानक झालेल्या भीषण स्फोटात एका कर्मचाऱ्याला आपले दोन्ही पाय गमवावे लागले आहेत. या घटनेमुळे संपूर्ण सोलापूर शहरात खळबळ उडाली असून परिसरात दहशतीचे वातावरण निर्माण झाले आहे.
सोमवारी दुपारी जुनी मिल कंपाऊंडमधील ‘सहारा गन हाऊस’ या दुकानासमोरील शॉपिंग कॉम्प्लेक्सबाहेर ही दुर्घटना घडली. केदारनाथ सिद्धप्पा छत्रे (वय ५३) हे कर्मचारी दुकानातून गंधकाने भरलेले बॉक्स आणि एअरगनच्या गोळ्यांचे (छर्रे) बॉक्स बाहेर उभ्या असलेल्या चारचाकी वाहनात ठेवत होते. सामानाची ने-आण सुरू असताना, अचानक त्यांच्या हातातील गंधकाचा एक बॉक्स निसटला आणि जमिनीवर जोरात आदळला. जमिनीवर आदळताच या बॉक्सचा प्रचंड तीव्रतेने स्फोट झाला.
हा स्फोट इतका भीषण होता की, केदारनाथ छत्रे यांच्या पायांच्या अक्षरशः चिंधड्या उडाल्या. स्फोटाच्या धक्क्याने ते रक्ताच्या थारोळ्यात कोसळले. घटनेचे गांभीर्य ओळखून स्थानिक नागरिकांनी तातडीने मदतीसाठी धाव घेतली आणि त्यांना शासकीय रुग्णालयात दाखल केले. मात्र, जखमा अत्यंत गंभीर असल्याने त्यांना पुढील उपचारासाठी खाजगी रुग्णालयात हलवण्यात आले आहे. डॉक्टरांनी दिलेल्या माहितीनुसार, या भीषण अपघातात छत्रे यांचे दोन्ही पाय निकामी झाले आहेत.
स्फोटाचा आवाज इतका मोठा होता की, आसपासचा संपूर्ण परिसर हादरून गेला. आवाजामुळे नागरिक आणि व्यापारी घाबरून रस्त्यावर आले. घटनेची माहिती मिळताच पोलिसांनी तातडीने घटनास्थळी धाव घेऊन परिसर सील केला. स्फोटाचे नेमके स्वरूप आणि त्यातील स्फोटक द्रव्याची तीव्रता तपासण्यासाठी ‘बॉम्ब शोधक व नाशक पथकाला’ (BDDS) पाचारण करण्यात आले.
ही सर्व अंगावर काटा आणणारी घटना परिसरातील सीसीटीव्ही कॅमेऱ्यात कैद झाली आहे. भररस्त्यात झालेल्या या स्फोटामुळे सुरक्षेचा प्रश्न ऐरणीवर आला आहे. ‘सहारा गन हाऊस’कडे अशा प्रकारचे स्फोटक गंधक आणि इतर साहित्य साठवण्याची किंवा त्याची ने-आण करण्याची अधिकृत परवानगी होती का? तसेच हे साहित्य नेताना सुरक्षेच्या नियमांचे पालन केले होते का? या दिशेने आता पोलीस कसून तपास करत आहेत. या घटनेमुळे शहरातील व्यापारी संकुलांमध्ये ठेवल्या जाणाऱ्या स्फोटक साहित्याच्या सुरक्षेबाबत आता प्रश्नचिन्ह उपस्थित केले जात आहेत.
