परभणी : शहरातील अंतर्गत व मुख्य रस्त्यांवरील अनधिकृत अतिक्रमण, पत्र्यांचे शेड, बांधकाम साहित्यामुळे वाहतूक कोंडी होत आहे. स्कूल बसच्या सुरक्षिततेचा प्रश्न, वाहतूक पोलिसांच्या कार्यपद्धतीतील त्रुटी तसेच दंड वसुलीच्या कार्यवाहीत कपात करण्याची मागणी करण्यात आली होती. परंतू या संदर्भात कुठलीही कार्यवाही न झाल्याने महापालिकेच्या विरोधात गुरुवार, दि. १९ नोव्हेंबर रोजी ऑल इंडिया युथ फेडरेशनने निदर्शन आंदोलन करत प्रशासनाचे लक्ष वेधण्याचा प्रयत्न केला.
या संदर्भात प्रशासनास दिलेल्या निवेदनात नमूद करण्यात आले आहे की, एका बाजूला शहरातील वाहन चालकांवर दंडात्मक कारवाई केली जात असताना दुस-या बाजूला शहरातील रस्त्यांवरील अतिक्रमण, अनधिकृत पार्किंग, बांधकाम साहित्यामुळे चौका-चौकात वाहतूक कोंडी होत आहे. परंतू या संदर्भात कुठलीही प्रभावी कारवाईत करण्यात येत असल्याचे दिसत नाही. वाहतूक पोलिस केवळ चालन किंवा दंड वसूल करण्यातच कार्यमग्न असल्याचे दिसत आहे. त्यामुळे या सर्व परिस्थितीचा विचार करुन शहरातील नागरिकांना वाहतूक कोंडीपासून दिलासा मिळवून द्यावा अशी मागणी निवेदनात करण्यात आली आहे.
परभणी शहरातील घरासमोरील अतिक्रमण तातडीने काढण्याचे जाहीर आवाहन करण्यात यावे. रस्त्यावर बांधकाम साहित्य टाकून वाहतुकीस अडथळा निर्माण करणा-याविरुध्द महानगरपालिका व पोलिस प्रशासनाने संयुक्त मोहीम राबवावी. शहरातील बसस्थानक, महात्मा फुले चौक, नारायण चाळ चौक, ग्रँड कॉर्नर, जिंतूर रोड, उड्डाणपूल, खानापूर फाटा, काळी कमान व वसमत रोड येथे गर्दीच्या वेळेत पुरेसे वाहतूक पोलिस कर्मचारी नियुक्त करावेत.
शाळा सुरू होण्याच्या व सुटण्याच्या वेळेत स्कूल बस मार्गांवर विशेष वाहतूक नियंत्रण व्यवस्था निर्माण करावी. रुग्णवाहिका, अग्निशमन दल व इतर अत्यावश्यक सेवांच्या वाहनांसाठी रस्ते मोकळे ठेवण्याची व्यवस्था करावी. प्रमुख चौकांमध्ये आवश्यकतेनुसार वाहतूक सिग्नल, नो-पार्किंग फलक, झेब्रा क्रॉसिंग व दिशादर्शक फलक बसवावेत. नागरिकांना वाहतूक संदर्भातील तक्रारी नोंदविण्यासाठी स्वतंत्र तक्रार अॅप किंवा मोबाईल नंबरलब्ध करून द्यावा अशी मागणी ऑल इंडिया युथ फेडरेशनचे संदिप सोळुंके यांनी निवेदनाद्वारे केली आहे. शहरातील उपोषण मैदान येथे गुरुवारी करण्यात आलेल्या निदर्शने आंदोलनात ऑल इंडिया युथ फेडरेशन, लालबावटा चालक-मालक संघटना परभणी, संघर्ष शालेय वाहन संघटना परभणीच्या पदाधिकारी, सदस्यांनी सहभाग नोंदविला होता.
















