जालना : मराठा आरक्षण आंदोलक मनोज जरांगे यांनी येत्या ३० मे पासून अंतरवाली सराटीत रखरखत्या उन्हात आमरण उपोषण करणार असल्याचे जाहीर केले आहे. सरकारला गेल्या १० महिन्यांपासून वेळ दिला होता, त्या काळात सातारा गॅझेटिअरवर जीआर काढला गेला नाही असे जरांगे यांनी म्हटले. उन्हात आमरण उपोषणाला बसणार असून मेलो तरी चालेल असे मनोज जरांगे म्हणाले. मला चर्चा नकोय, आरक्षणाची अंमलबजावणी पाहिजे असे मनोज जरांगे यांनी म्हटले आहे.
मराठा आरक्षण आंदोलक मनोज जरांगे यांनी सरकारला १० महिने वेळ दिल्याचे सांगितले. माझा नाइलाज आहे, मला कोणाला दोष द्यायचा नाही, आपल्या लेकराला, समाजाला मिळत नसेल तर आपण कठोर भूमिका घेणे गरजेचे आहे. मी सीमारेषेवर आलेलो आहे, ३० मे चे आमरण उपोषण ठरवले आहे, त्यात बदल केला आहे. आमरण उपोषण सावलीत, मंडपात, फॅनमध्ये आपण ते करत होतो, सगळे तसेच करतात. मला अंतिम टोकाचे आणि कठोर आमरण उपोषण करायचे आहे, रखरखत्या उन्हात हे उपोषण बाज टाकून करणार आहे. ना कुठले पाणी, ना कुठले जेवण, ना पायात चप्पल घालणार असे मनोज जरांगे म्हणाले.
माझ्या शरीरात प्रचंड वेदना आहेत, जे काही होईल ते होईल, उष्माघाताचा बळी गेला तर देवेंद्र फडणवीसांमुळे गेला, सरकारमुळे गेला. कितीही जीवाची लाही लाही झाली तरी हरकत नाही, कारण माझ्या समाजाच्या लेकरांच्या आयुष्याचा उन्हाळा झाला, तर आपण आपली कदर का करायची असे मनोज जरांगे म्हणाले. आमरण उपोषण कुठेही होईल, जंगलात होईल, रानात होईल, कडक उन्हात ते उपोषण होईल यावर मी ठाम आहे. किती वेदना होतील याचा विचार करायचा नाही हे ठरवलं आहे. सारखी सारखी उपोषणं करून जीवाला वेदना होत आहेत. एकदा तुकडा पडू देत, सरकारचा तुकडा पडेल किंवा माझा तुकडा पडेल. हे आंदोलन सुरू आहे त्याला तीन वर्षे झाली आहेत. मे महिन्याच्या कडक रखरखत्या उन्हात हे आमरण उपोषण होणार आहे असे मनोज जरांगे यांनी म्हटले.
कुणबी मराठा मंत्रालय स्थापन करायला वेळ का लागतोय?
माझ्या समाजाच्या लेकराचा उन्हाळा होतोय, ते कुठेतरी थांबले पाहिजे. आमरण उपोषण फायनल झाले आहे, यात बदल होणार नाही. मराठा समाजाने अंतरवाली सराटीकडे येऊ नये, असेही मनोज जरांगे यांनी आवाहन केले आहे. देशात इतके टोकाचे आमरण उपोषण झाले असेल असे वाटत नाही, असेही जरांगे यांनी म्हटले. प्रसाद लाड, राधाकृष्ण विखे पाटील येणार की नाही हे मला माहिती नाही. २९ ऑगस्टपासून उद्यापर्यंत १० महिन्यांचा वेळ दिला आहे.
