मुंबई: मराठी सिनेमाची ताकद काय आहे, हे पुन्हा एकदा सिद्ध झाले आहे. जिओ स्टुडिओज आणि मुंबई फिल्म कंपनीची निर्मिती असलेला, तसेच रितेश देशमुख दिग्दर्शित आणि अभिनित ‘राजा शिवाजी’ या चित्रपटाने बॉक्स ऑफिसवर ऐतिहासिक घोडदौड सुरू ठेवली आहे. महाराष्ट्र दिनाचे (१ मे) औचित्य साधून रिलीज झालेल्या या चित्रपटाने अवघ्या १७ दिवसांत जगभरात तब्बल ११४ कोटी रुपयांची बंपर कमाई केली आहे. यासह, सैराटनंतर १०० कोटींचा टप्पा ओलांडणारा हा मराठी सिनेसृष्टीच्या इतिहासातील दुसराच चित्रपट ठरला आहे.
१० वर्षांनंतर मोडणार ‘सैराट’चा रेकॉर्ड
२०१६ मध्ये आलेल्या ‘सैराट’ चित्रपटाने जगभरात ११० कोटींचे ग्रॉस कलेक्शन करून मराठी इंडस्ट्रीमध्ये एक न मोडणारा इतिहास रचला होता. गेल्या १० वर्षांत अनेक मोठे मराठी चित्रपट आले, पण कोणालाही सैराटच्या जवळ पोहोचता आले नव्हते. मात्र, ‘राजा शिवाजी’ चित्रपटाने अवघ्या तिसऱ्या वीकेंडमध्येच (१७ व्या दिवशी) भारतात ९३.१० कोटींचे नेट (१०९.९ कोटी ग्रॉस) कलेक्शन केले आहे. तर परदेशातील ४.९० कोटींची कमाई पकडून जगभरातील एकूण आकडा ११४ कोटींच्या पार गेला आहे. ट्रेड विश्लेषकांच्या मते, या आठवड्यात ‘राजा शिवाजी’ हा सैराटला कायमचे मागे टाकून मराठीतील सर्वाधिक कमाई करणारा ‘नंबर १’ चित्रपट बनेल.
‘राजा शिवाजी’ची आठवडाभरातील कमाई अशी:
पहिला दिवस (ओपनिंग): १३.५१ कोटी (मराठी सिनेसृष्टीतील ऐतिहासिक ओपनिंग)
पहिला आठवडा: ५२.६५ कोटी
दुसरा आठवडा: २४.३० कोटी
१७ व्या दिवशी (तिसरा रविवार): ४.०७ कोटी
एकूण भारतीय नेट कमाई: ९३.१० कोटी रुपये (ग्रॉस १०९.९ कोटी)
एकूण वर्ल्डवाईड कमाई: ११४ कोटींपेक्षा जास्त
दिग्दर्शक म्हणून रितेश यांचा दबदबा
अभिनेता म्हणून प्रेक्षकांच्या मनावर राज्य करणाऱ्या रितेश देशमुख यांनी दिग्दर्शक म्हणूनही आपली हुकूमशाही सिद्ध केली आहे. यापूर्वी त्याच्या ‘वेड’ चित्रपटाने ६१ कोटींपेक्षा जास्त कमाई केली होती. आता टॉप ५ सर्वाधिक कमाई करणाऱ्या मराठी चित्रपटांच्या यादीत रितेश देशमुख यांच्या २ चित्रपटांचा (‘राजा शिवाजी’ आणि ‘वेड’) समावेश झाला आहे.
सर्वाधिक कमाई करणारे टॉप ५ मराठी चित्रपट (लाइफटाईम कलेक्शन):
१. सैराट – ११० कोटी ग्रॉस
२. राजा शिवाजी – १०९.९ कोटी ग्रॉस (१७ दिवसांत – अजूनही थिएटरमध्ये सुरू)
३. बाईपण भारी देवा – ९०.५० कोटी ग्रॉस
४. वेड – ७५ कोटी ग्रॉस
५. नटसम्राट – ४२ कोटी ग्रॉस
तगडी स्टारकास्ट आणि कौतुकाची थाप
छत्रपती शिवाजी महाराज यांच्या जीवनचरित्रावर आधारित या चित्रपटाला प्रेक्षकांसोबतच समीक्षकांनीही डोक्यावर घेतले आहे. चित्रपटात रितेश आणि जिनिलीया देशमुख यांच्यासोबतच संजय दत्त, अभिषेक बच्चन, विद्या बालन, महेश मांजरेकर, सचिन खेडेकर आणि भाग्यश्री यांच्यासारख्या दिग्गज कलाकारांची फौज पाहायला मिळत आहे. दर्जेदार व्हीएफएक्स (VFX), खिळवून ठेवणारी पटकथा आणि रितेशने साकारलेले महाराजांचे रूप यामुळे प्रेक्षक चित्रपटगृहांकडे मोठ्या संख्येने खेचले जात आहेत. मराठी बॉक्स ऑफिसवर सध्या ‘राजा शिवाजी’ची ही घोडदौड रोखणे अशक्य दिसत असून, हा चित्रपट नेट कलेक्शनमध्येही लवकरच १०० कोटींचा पल्ला गाठणारा पहिला मराठी चित्रपट ठरेल, अशी आशा वर्तवली जात आहे.
