न्यूयॉर्क : अमेरिका आणि इराण यांच्यात झालेल्या ऐतिहासिक शांतता करारावर आता अमेरिकेतूनच अंतर्गत विरोध आणि टीका सुरू झाली आहे. अमेरिकेचे माजी राष्ट्राध्यक्ष बराक ओबामा यांनी राष्ट्राध्यक्ष डोनाल्ड ट्रम्प यांच्या या नव्या करारावर जोरदार टोला लगावला आहे. हा नवा करार म्हणजे दुसरे काही नसून २०१५ मधील जुन्या अणू कराराचीच नवीन प्रत आहे अशी घणाघाती टीका ओबामांनी केली आहे.
विशेष म्हणजे, ज्या २०१५ च्या अणू करारातून डोनाल्ड ट्रम्प यांनी २०१८ मध्ये अमेरिकेला बाहेर काढले होते, हुबेहूब तसाच करार ट्रम्प यांनी आता स्वत: केल्यामुळे अमेरिकन राजकारणात नवा वाद पेटला आहे. बराक ओबामा राष्ट्राध्यक्ष असताना २०१५ मध्ये इराणसोबत ऐतिहासिक अणू करार झाला होता. या करारानुसार इराणने आपल्या अणू कार्यक्रमावर मर्यादा आणणे आणि अणू बॉम्ब न बनवण्याचे मान्य केले होते. तसेच आंतरराष्ट्रीय निरीक्षकांना तपासणीची परवानगी दिली होती. या बदल्यात इराणवरील आर्थिक निर्बंध हटवले जाणार होते. या करारामध्ये इराणचा बॅलिस्टिक मिसाइल कार्यक्रम आणि हिजबुल्लाह-हमास सारख्या लष्करी गटांना मिळणारा पाठिंबा, या मुद्द्यांचा समावेश नव्हता. याच कमतरतेवर बोट ठेवत २०१८ मध्ये ट्रम्प यांनी पहिल्या कार्यकाळात अमेरिकेला या करारातून बाहेर काढले आणि इराणवर पुन्हा कठोर निर्बंध लादले होते.
सध्याची परिस्थिती
आश्चर्याची बाब म्हणजे, ट्रम्प यांनी आता केलेल्या नव्या १४ कलमी शांतता करारातूनही इराणचा मिसाइल कार्यक्रम आणि प्रॉक्सी गटांचा मुद्दा पूर्णपणे बाद करण्यात आला आहे, ज्यामुळे ओबामांनी ट्रम्प यांना घेरले आहे.
इराणच्या अणू इतिहास आणि सद्यस्थिती
इराण नेहमीच आपला अणू कार्यक्रम शांततापूर्ण हेतूंसाठी (वीज निर्मिती) असल्याचा दावा करतो, मात्र अमेरिका आणि इस्रायलचा याला नेहमीच विरोध राहिला आहे.
