केज : बीड जिल्ह्यातील केजमध्ये एक धक्कादायक प्रेमप्रकरण समोर आले. दोघांनीही आयुष्य संपवल्यानंतर ही घटना समोर आली आहे. एक २१ वर्षीय तरुण आणि त्याची सावत्र आई यांचे एकमेकांवर प्रेम जडले. त्यानंतर ते घरातून पळून गेले. पण, परत घरी आणल्यानंतर दोघांनी आयुष्याचा शेवट केला. तरुणाने विष प्राशन केले, तर त्याच्या मृत्यूचा धक्का बसल्याने सावत्र आईने रुग्णालयाच्या परिसरातच गळफास घेतला.
बीड जिल्ह्यातील केज तालुक्यात ही घटना घडली. तालुक्यातील सोनी जवळा गावातील साहेबराव पवार (वय ४०) यांचा पहिल्या पत्नीसोबत घटस्फोट झाला होता. घटस्फोटानंतर त्यांनी चार वर्षांपूर्वी अनिता नावाच्या महिलेसोबत लग्न केले होते. साहेबराव यांनी लग्न केल्यानंतर संसार सुरू होता, पण मुलगा अनिल पवार (वय २१) आणि अनिता यांच्यातच प्रेमसंबंध जुळले. दोघेही एकमेकांबद्दल खूप सीरियस झाले आणि घरातून पळून गेले. साहेबराव यांनी पोलिस ठाण्यात धाव घेऊन दोघेही बेपत्ता झाल्याची तक्रार दिली. पोलिसांनी तपास सुरू केला. त्यांच्या मोबाईलचे लोकेशन शोधण्यात आले. दोघेही तेलंगणात असल्याचे कळले. पोलिसांनी तेलंगणा गाठले आणि दोघांनाही परत आणले.
मुलगा विष प्यायला, महिलेला बसला धक्का
घरी आल्यानंतर आपले संबंध सगळ्यांना कळले, आपली बदनामी झाली, यातून अनिल नैराश्यात गेला आणि त्याने विषारी द्रव्य प्राशन केले. त्याला तातडीने अंबाजोगाई येथील स्वामी रामानंद तीर्थ वैद्यकीय रुग्णालयात दाखल करण्यात आले. उपचार सुरू असतानाच त्याचा मृत्यू झाला. तर हे वृत्त माहिती होताच अनिताने त्याच रुग्णालयाजवळ गळफास लावून आत्महत्या केली.
