पाथरी : येथे आयोजित करण्यात आलेल्या तालुकास्तरीय शालेय कबड्डी स्पर्धेत प. पु. चिंतामणी महाराज माध्यमिक विद्यालय गुंज खुर्दच्या कबड्डी संघाने उत्कृष्ट खेळाचे प्रदर्शन करत सलग चौथ्या वर्षी विजेतेपद पटकावून आपल्या विजयी परंपरेत आणखी एक मानाचा तुरा रोवला. या स्पर्धेतील अंतिम सामन्यात चिंतामणी विद्यालयाच्या संघाने जय किसान माध्यमिक विद्यालय उमरा संघाविरुद्ध दमदार खेळ करत शानदार विजय मिळवला. या विजयामुळे चिंतामणी विद्यालयाच्या संघाची जिल्हास्तरीय कबड्डी स्पर्धेसाठी निवड झाली आहे.
शिवसेना (उबाठा) जिल्हाप्रमुख रवींद्र धर्मे यांनी विजयी संघाचे अभिनंदन केले. विजयी खेळाडूंना स्पोर्ट्स किट प्रदान करण्यात आले. या यशाबद्दल संस्थेचे अध्यक्ष परमानंद मोदानी, सचिव रामबल्लभ पोरवाल, संस्थेचे सर्व पदाधिकारी यांनी विजयी संघाचे अभिनंदन केले. पाथरी तालुक्याचे गटशिक्षणाधिकारी मुकेश राठोड, तालुका क्रीडा समन्वयक तुकाराम शेळके, केंद्रप्रमुख सलीम शेख यांनीही संघाचे कौतूक करून जिल्हास्तरीय स्पर्धेसाठी शुभेच्छा दिल्या. विद्यालयाचे मुख्याध्यापक गिरी, देशमुख, कदम, काळे, वीरकर, कारेगावकर, दुगाने, पवार, वाघ सर यांनी खेळाडूंचे अभिनंदन केले.
क्रीडा क्षेत्रातील या उल्लेखनीय यशामुळे गुंज खुर्द परिसरात आनंदाचे वातावरण निर्माण झाले असून, विद्यार्थ्यांमध्येही उत्साहाचे वातावरण आहे. या यशामागे खेळाडूंची मेहनत, प्रशिक्षकांचे मार्गदर्शन, शिक्षकांचे प्रोत्साहन आणि संस्थेचे सातत्यपूर्ण पाठबळ असल्याचे विद्यालयाच्या वतीने सांगण्यात आले. चिंतामणी विद्यालयाचा संघ जिल्हास्तरीय स्पर्धेतही उत्कृष्ट कामगिरी करण्यासाठी सज्ज झाला आहे.
