पॉकेटबंदचे दर जैसे थे
मुंबई : प्रतिनिधी
सणासुदीच्या तोंडावर मुंबईकरांच्या घरगुती बजेटवर महागाईचा मोठा फटका बसणार आहे. मुंबई दुग्ध उत्पादक संघाने सुट्या म्हशीच्या दुधाच्या घाऊक दरात प्रतिलिटर ९ रुपयांची मोठी वाढ करण्याचा निर्णय घेतला आहे. यामुळे १ सप्टेंबर २०२६ पासून मुंबईत सुट्या दुधाचा घाऊक दर ९३ रुपयांवरून थेट १०२ रुपये प्रतिलिटर होणार आहे. हे नवे दर २८ फेब्रुवारी २०२७ पर्यंत पुढील सहा महिन्यांसाठी लागू राहतील. त्यानंतर पुन्हा एकदा याचा आढावा घेतला जाणार आहे. हे घाऊक दर असल्याने किरकोळ बाजारात ग्राहकांना स्थानिक विक्रेते आणि वाहतूक खर्चानुसार दुधासाठी अतिरिक्त मोजावे लागण्याची शक्यता आहे.
पॅकेटबंद दुधाच्या दरांवर या वाढीचा थेट परिणाम होणार नाही. अमूल किंवा मदर डेअरी यांसारख्या कंपन्या आपापल्या उत्पादन खर्चानुसार किरकोळ दर ठरवतील. दाणा, तूरचुणी, चणाचुणी, चारा आणि पेंड यासारख्या पशुखाद्याच्या दरात २५ टक्क्यांपर्यंत वाढ झाली. तसेच दुधाळ जनावरांच्या खरेदीच्या किमती मोठ्या प्रमाणावर वाढल्या आहेत. याशिवाय शुद्ध दुधाची मागणी वाढली आहे.
दरम्यान, महाराष्ट्र दूध वितरक सेनेचे कार्याध्यक्ष राम कदम यांनी या दरवाढीवर प्रतिक्रिया देताना सांगितले की, भेसळ रोखल्याने निर्माण झालेल्या तुटवड्याचा गैरफायदा घेत खाजगी डेअरींची मनमानी सुरू झाली आहे. आरे किंवा महानंदासारख्या सरकारी डेअरी पूर्ण क्षमतेने सुरू असत्या तर ही मनमानी झाली नसती.
सणासुदीत ग्राहकांच्या
खिशाला लागणार कात्री
सप्टेंबर महिन्यापासून गणेशोत्सव, नवरात्र आणि दिवाळी यांसारखे मोठे सण सुरू होत आहेत. या काळात दूध, दही, खवा, तूप आणि मिठाईची मागणी प्रचंड वाढते. त्यामुळे या दरवाढीचा थेट परिणाम सणांच्या बजेटवर होणार आहे.
