लातूर : प्रतिनिधी
तालुक्यातील भातांगळी येथील ग्रामपंचायत कार्यालयात रोटरी क्लब ऑफ लातूर मेट्रो आणि शंकर शेठ साबळे नेत्रालय यांच्या संयुक्त विद्यमाने नेत्र तपासणी शिबिराचे आयोजन करण्यात आले. या शिबिरास ग्रामस्थांचा उत्स्फूर्त प्रतिसाद मिळाला. एकूण १२० रुग्णांची नेत्र तपासणी करण्यात आली असून, त्यापैकी ४२ रुग्णांना मोतीबिंदूचे निदान झाले आहे. या सर्व रुग्णांवर येत्या ३० ऑगस्ट रोजी मोफत मोतीबिंदू शस्त्रक्रिया करण्यात येणार आहे.
शंकर शेठ साबळे नेत्र रुग्णालयाचे डॉ. महेश पवार, डॉ. सिंधुताई शिंदे आणि सहाय्यक आकाश सावंत यांनी रुग्णांची तपासणी करून त्यांना आवश्यक मार्गदर्शन केले. याचवेळी रोटरी क्लब ऑफ लातूर मेट्रो आणि प्रजापिता ब्रह्माकुमारी ईश्वरीय विश्वविद्यालय यांच्या संयुक्त विद्यमाने नशामुक्ती अभियानांतर्गत सामूहिक शपथविधी घेण्यात आला. यावेळी व्यसनाचे दुष्परिणाम याबाबत उपस्थितांना मार्गदर्शन करण्यात आले. तसेच ग्रामपंचायत कार्यालयासमोरील जिल्हा परिषद शाळेच्या प्रांगणात रक्तदान शिबिराचेही आयोजन करण्यात आले.
या तीनही उपक्रमांना ग्रामपंचायतीचे सरपंच, उपसरपंच, सदस्य, जिल्हा परिषद हायस्कूलचे मुख्याध्यापक, शिक्षक आणि ग्रामस्थांनी उत्स्फूर्त सहकार्य केले. ग्रामपंचायत भातागळीचे सरपंच परमेश्वर पाटील यांचे प्रतिनिधी भागवत गरड तसेच जिल्हा परिषद हायस्कूलचे किशोर गायकवाड यांनी विशेष सहकार्य केले. रोटरी क्लब ऑफ लातूर मेट्रोचे अध्यक्ष विजय कोळी, सचिव मनोज सूर्यवंशी, सहसचिव दत्ता बेडके, प्रोजेक्ट चेअरमन विकास कातपुरे यांच्यासह अनेक रोटरी सदस्य उपस्थित होते. प्रजापिता ब्रह्माकुमारी ईश्वरीय विश्वविद्यालयाच्या नंदाबहनजी, पुण्या बहनजी यांच्यासह पदाधिकारी व कार्यकर्तेही उपस्थित होते. नेत्र तपासणी, नशामुक्ती आणि रक्तदान अशा तीन सामाजिक उपक्रमांच्या माध्यमातून भातांगळी ग्रामस्थांना आरोग्यसेवेचा लाभ मिळाल्याने ग्रामस्थांनी रोटरी क्लब ऑफ लातूर मेट्रोसह सर्व आयोजक व सहकार्य करणा-या व्यक्तींचे मन:पूर्वक आभार मानले.
