लातूर : प्रतिनिधी
रोटरी क्लब ऑफ लातूर मेट्रोच्या वतीने लातूर तालुक्यातील शिवणी (बु.) येथे मातृ-बाल आरोग्य व संगोपनाच्या दृष्टीने विशेष प्रकल्पाचे आयोजन करण्यात आले. या उपक्रमांतर्गत ६ महिन्यांखालील बालकांसाठी तयार करण्यात आलेल्या बेबी केअर किटचे वाटप करण्यात आले. या उपक्रमामुळे ग्रामीण भागातील माता व बालकांच्या आरोग्य, स्वच्छता आणि योग्य संगोपनाबाबत जनजागृती होण्यास मोठी मदत झाली.
या बेबी केअर किटमध्ये आवश्यक वस्तूंचा समावेश होता. बालकांच्या दैनंदिन स्वच्छता व संगोपनासाठी आवश्यक साहित्य एकाच किटमध्ये उपलब्ध करून देण्यात आल्याने लाभार्थी मातांनी रोटरी क्लबच्या या उपक्रमाबद्दल समाधान व्यक्त केले. यावेळी गरोदर महिला व स्तनदा मातांसाठी मार्गदर्शनपर माहिती पुस्तिकेचे वितरण करण्यात आले. मातांनी गर्भावस्थेपासूनच स्वत:च्या आरोग्याची काळजी घेणे, योग्य आहार घेणे तसेच बालकाच्या जन्मानंतर स्तनपान, स्वच्छता आणि पोषण याबाबत आवश्यक काळजी घेणे, याविषयी माहिती देण्यात आली.
कार्यक्रमात आहारतज्ज्ञ विकास कातपुरे व विजय कोळी यांनी उपस्थित माता व ग्रामस्थांना आहार आणि पोषणाबाबत मार्गदर्शन केले. बालकांच्या सर्वांगीण विकासासाठी योग्य आहार, स्वच्छता आणि मातांच्या आरोग्याचे महत्त्व यावर त्यांनी सविस्तर माहिती दिली. या उपक्रमादरम्यान केवळ आरोग्यविषयक मार्गदर्शन न करता सामाजिक बांधिलकीचा संदेशही देण्यात आला. उपस्थितांनी स्वच्छता, बालविवाह न करणे, व्यसनमुक्ती तसेच पालकांची सेवा करण्याची शपथ घेतली. त्यामुळे या कार्यक्रमाला आरोग्याबरोबरच सामाजिक जनजागृतीचीही जोड मिळाली.
गावातील आरोग्यविषयक उपक्रमांमध्ये सातत्याने मेहनत घेणा-या आशा कार्यकर्त्यांचा यावेळी विशेष सन्मान करण्यात आला. ग्रामीण भागात माता व बालकांपर्यंत आरोग्यविषयक सेवा आणि माहिती पोहोचविण्यात आशा कार्यकर्त्यांची भूमिका महत्त्वाची असल्याचे यावेळी नमूद करण्यात आले. या प्रकल्पाचे चेअरमन हरिश्चंद्र पाटील होते, तर प्रमुख व्यवस्थापनाची जबाबदारी रो. संतोष कासले यांनी सांभाळली. कार्यक्रमास रोटरी क्लब ऑफ लातूर मेट्रोचे अध्यक्ष विजय कोळी, सचिव मनोज सूर्यवंशी, सहसचिव दत्ता बेडके यांच्यासह एकूण १६ रोटेरियन उपस्थित होते.
कार्यक्रमास माजी पंचायत समिती सदस्य, उपसरपंच, पोलीस पाटील तसेच अनेक ग्रामस्थ मोठ्या संख्येने उपस्थित होते. रोटरी क्लबच्या माध्यमातून ग्रामीण भागात राबविण्यात येत असलेल्या या सामाजिक उपक्रमाचे ग्रामस्थांनी कौतुक केले. माता व बालकांच्या आरोग्यासाठी तसेच सामाजिक जनजागृतीसाठी रोटरी क्लबने घेतलेल्या पुढाकाराबद्दल उपस्थितांनी आनंद व कृतज्ञता व्यक्त केली. समाजातील गरजू घटकांपर्यंत प्रत्यक्ष पोहोचून आरोग्य, स्वच्छता, पोषण आणि सामाजिक जबाबदारीचा संदेश देणारा शिवणी येथील हा उपक्रम रोटरी क्लब ऑफ लातूर मेट्रोच्या सामाजिक बांधिलकीचे प्रभावी उदाहरण ठरला. या प्रकल्पामुळे रोटरी क्लबची सामाजिक प्रतिमा अधिक उंचावण्यास निश्चितच हातभार लागला. कार्यक्रमाच्या यशस्वी आयोजनासाठी सहकार्य करणा-या सर्वांचे रोटरी क्लब ऑफ लातूर मेट्रोचे सचिव मनोज सूर्यवंशी यांनी आभार मानले.
