ठाणे : ठाण्यातील एका लॉजमध्ये प्रियकराने प्रेयसीची उशीने तोंड दाबून हत्या केल्याची घटना समोर आली आहे. या प्रकरणी ठाणे नगर पोलिसांनी आरोपी प्रियकराला अटक केली असून त्याच्याविरोधात हत्येचा गुन्हा दाखल केला आहे. प्रेयसीचे इतर कोणासोबत तरी प्रेमसंबंध असल्याच्या संशयावरून खून केल्याची प्राथमिक माहिती समोर येत आहे.
मिळालेल्या माहितीनुसार, संध्या म्हस्के (वय २३, रा. भांडुप) आणि नंदकिशोर गाडेकर (वय २७, रा. विष्णूनगर, डोंबिवली) यांच्यात गेल्या चार वर्षांपासून प्रेमसंबंध होते. गुरुवारी ठाणे नगर पोलिस ठाण्याच्या हद्दीतील ‘महाराजा हॉटेल लॉज’ येथे हे दोघे आले होते. काही वेळानंतर दोघांमध्ये वाद झाला अन् आरोपी नंदकिशोरने उशीच्या साहाय्याने संध्याचे तोंड दाबले. श्वास गुदमरल्याने संध्याचा घटनास्थळीच मृत्यू झाला.
यानंतर तो खोलीला बाहेरून कुलूप लावून निघून गेला. आरोपी एकटाच बाहेर पडल्याने लॉजच्या कर्मचा-यांना संशय आला. त्यांनी खोलीत जाऊन पाहिले असता तरुणी निपचित पडलेली दिसून आली. कर्मचा-यांनी तात्काळ ठाणे नगर पोलिसांना माहिती दिली. माहिती मिळताच पोलिसांचे पथक घटनास्थळी दाखल झाले आणि त्यांनी तपासाची चक्रे वेगाने फिरवली अन् दोन तासांत आरोपीला ताब्यात घेतले.
