बोरी : जिंतूर तालुक्यातील कौसडी येथे गोवंश हत्याबंदी कायद्याचे उल्लंघन करून बेकायदेशीररीत्या गोवंशाची हत्या करून मांस कापले जात असल्याची गोपनीय माहिती मिळताच बोरी पोलिसांनी तातडीने धडक कारवाई केली. या कारवाईत अंदाजे १०० किलो गोवंश जातीचे मांस व इतर साहित्य असा एकूण ३१५०० किंमतीचा मुद्देमाल जप्त करण्यात आला. या प्रकरणी शेख मोइन अब्दुल करीम (वय ३२), शेख मोसीन अब्दुल करीम (वय २८) रा. कौसडी यांच्याविरुद्ध गुन्हा दाखल करण्यात आला आहे.
याबाबत सविस्तर माहिती अशी की, दि. २८ जुलै रोजी सकाळी ७ वाजता कौसडी येथील चांभार गल्ली परिसरातील राहत्या घरावर पोलिसांनी छापा टाकला. कारवाई दरम्यान अंदाजे १०० किलो गोवंश जातीचे मांस, दोन सत्तूर, एक धारदार कु-हाड आणि लाकडी खोड असा एकूण ३१५०० किंमतीचा मुद्देमाल जप्त करण्यात आला. सहाय्यक पोलीस निरीक्षक रामेश्वर धोंडगे यांच्या मार्गदर्शनाखाली ही कारवाई करण्यात आली. या कारवाईत बीट जमादार राजेश जटाळे, पोलिस कर्मचारी अमोल मुंडे, प्रताप साळवणे, संघसेन कांबळे, प्रकाश मोरे आणि फरहीन रंगरेज यांचा सहभाग होता. यापूर्वीही कौसडी परिसरात गोवंश संरक्षण कायद्यांतर्गत झालेल्या कारवायांमध्ये बीट जमादार राजेश जटाळे यांनी सक्रिय भूमिका बजावली आहे.
या प्रकरणी पोलिस शिपाई प्रकाश मोरे यांनी दिलेल्या फिर्यादीवरून पोलिस ठाणे बोरी येथे आरोपींविरुद्ध प्राणी छळ प्रतिबंध अधिनियम कलमान्वये गुन्हा दाखल करण्यात आला आहे. कौसडी प्रमाणे बोरीत सुद्धा गोवंश हत्या होत असल्याची चर्चा असून या ठिकाणी कारवाई व्हायला पाहिजे असा सूर नागरिकांमधून व्यक्त येत आहे. पुढील तपास पोलीस हवालदार प्रताप साळवणे करीत आहेत.
