छ. संभाजीनगर : प्रतिनिधी
छत्रपती संभाजीनगरमध्ये उमेदवारीवरून भाजपमध्ये सलग दुस-या दिवशीही मोठ्या प्रमाणावर गोंधळ निर्माण झाल्याचे चित्र दिसून येत आहे. त्यामुळे शेकडो कार्यकर्त्यांनी छत्रपती संभाजीनगरमधील भाजप पक्ष कार्यालयाला घेराव घालत जोरदार राडा केला होता. यावेळी संतापलेल्या इच्छुक उमेदवारांची आमदार केनेकरांनी समजूत काढण्याचा प्रयत्न केला. तर दुसरीकडे दिव्या मराठे यांच्यासह इतर काही महिलांनी उपोषणाला सुरुवात केली होती.
राज्यातील २९ महापालिकांसाठी मंगळवारी (३० डिसेंबर) उमेदवारी अर्ज दाखल झाले आहेत. महत्त्वाचे म्हणजे छत्रपती संभाजीनगरमध्ये अर्ज दाखल करण्याच्या शेवटच्या दिवशी महायुतीचा घटक पक्ष असलेल्या भाजप आणि शिवसेनेची युती तुटली. त्यानंतर भाजपने इच्छुक उमेदवारांना तिकिट दिले नाही, त्यामुळे शेकडो कार्यकर्त्यांनी छत्रपती संभाजीनगरमधील भाजप कार्यालयाला घेराव घालत जोरदार राडा केला. हा राडा बुधवारी (ता. ३१ डिसेंबर) सुद्धा पाहायला मिळाला. नाराज इच्छुक उमेदवारांपैकी प्रशांत बधाणे पाटील यांनी आत्मदहनाचा सुद्धा प्रयत्न केला. ज्यानंतर भाजप आमदार संजय केनेकर यांनी बधाणे पाटील यांची समजूत काढण्याचा प्रयत्न केला. परंतु, काहीही ऐकण्याच्या परिस्थितीत नसलेले बधाणे पाटील यांनी मी कुठे कमी पडलो साहेब? म्हणत केनेकरांसमोर टाहो फोडला. मात्र, पक्षात एकाच वेळेस सर्वांना न्याय देता येत नाही, असे यावेळी केनेकरांकडून स्पष्टपणे सांगण्यात आले.
छत्रपती संभाजीनगरमध्ये उमेदवारीवरून भाजपमध्ये सलग दुस-या दिवशीही मोठ्या प्रमाणावर गोंधळ निर्माण झाल्याचे चित्र दिसून येत आहे. संतापलेल्या इच्छुक उमेदवारांनी आणि संतप्त कार्यकर्त्यांनी भाजप नेते भागवत कराड आणि मंत्री अतुल सावे यांच्या गाडीला घेराव घातला, यावेळी त्यांनी मोठ्या प्रमाणावर संताप व्यक्त करत गंभीर स्वरूपाचे आरोप देखील केले. पण कराड आणि सावे या दोन्ही नेत्यांना कार्यकर्त्यांची समजूत काढण्यात अपयश आल्यानंतर या ठिकाणी आमदार केनेकरांकडून कार्यकर्त्यांची भेट घेऊन त्यांची समजूत काढण्याचा प्रयत्न करण्यात आला.
कराड, अतुल सावे यांचे फोटो फाडले
भाजप नेते भागवत कराड आणि अतुल सावे कार्यालयात आले. त्यानंतर पदाधिका-यांनी भागवत कराड आणि अतुल सावे यांच्या गाडीला घेराव घातला व जोरदार घोषणा देण्यास सुरुवात केली. यावेळी संतापलेल्या भाजप कार्यकर्त्यांनी भागवत कराड आणि अतुल सावे यांचे फोटो फाडले, तसेच त्यांच्या गाडीला काळे फासण्याचा प्रयत्न केला. तसेच काही इच्छुक उमेदवारांनी घटनास्थळी गोंधळ घालत अंगावर पेट्रोल ओतून घेऊन आत्मदहनाचा प्रयत्न देखील केला.
भाजपच्या नाराजांचे उपोषणास्त्र, कार्यालयातच मांडले ठाण
तिकिट वाटपात निष्ठावंतांना डावलल्याचा आरोप कार्यकर्त्यांकडून करण्यात आला. यावेळी काही कार्यकर्त्यांनी आत्मदहनाचा देखील इशारा दिला होता. मात्र आता कालच्या राड्यानंतर उमेदवारीसाठी इच्छुक असणा-या महिलांनी उपोषणाला सुरुवात केली आहे. तिकिट कापल्यामुळे नाराज असणा-या छत्रपती संभाजीनगर प्रभाग क्र. २० गादीया विहारच्या भाजप कार्यकर्त्या दिव्या मराठे या उमेदवारीसाठी इच्छुक होत्या. दिव्या मराठे यांनी याबाबत पक्षश्रेष्ठींना जाब विचारण्यासाठी प्रचार कार्यालय गाठले. यावेळी त्यांनी तिकिट मिळेपर्यंत उपोषणाचा इशारा दिला होता.
