लातूर : प्रतिनिधी
दंतचिकित्सा क्षेत्रात आधुनिक विज्ञान, तंत्रज्ञान आणि संशोधनाला मानवी संवेदनशीलतेची जोड देणे आवश्यक आहे. अत्याधुनिक तंत्रज्ञान हे उपचार अधिक अचूक आणि प्रभावी करण्याचे साधन आहे; मात्र रुग्णाचा विश्वास, करुणा आणि सेवाभाव हे दंतचिकित्सेचे मूलभूत आधार आहेत, असे प्रतिपादन माईर एमआयटी शिक्षण संस्था समूहाचे कार्यकारी संचालक डॉ. हनुमंत कराड यांनी केले.
एमआयडीएसआर दंत महाविद्यालय, लातूर येथे आयोजित ‘दंतवेदांता २०२६’ या परिषदेत डॉ. कराड बोलत होते. यावेळी उपप्राचार्य डॉ. यतीशकुमार जोशी, संस्थात्मक विकास अधिकारी डॉ. कैलास शेळके, डॉ. ओम बघेले, डॉ. विजयलक्ष्मी माले व डॉ. गौरी उगले यांची प्रमुख उपस्थिती होती. ‘विज्ञान आणि अध्यात्माच्या साहाय्याने हास्यात सुसंवाद साधणे’ या बोधवाक्याखाली आयोजित करण्यात आलेल्या या दुस-या राज्यस्तरीय परिषदेत राज्यातील विविध भागांतून दंतचिकित्सक, प्राध्यापक, संशोधक आणि विद्यार्थी सहभागी झाले.
‘विज्ञान आपल्याला काय करायचे आणि कसे करायचे हे शिकवते; तर अध्यात्म आपण हे का करीत आहोत, याची जाणीव करून देते. ज्ञानाला करुणेची जोड मिळाली तरच आरोग्य सेवा ख-या अर्थाने अर्थपूर्ण ठरते.’ दंतचिकित्सकांनी केवळ रुग्णाच्या दातांवर उपचार न करता त्याची भीती, चिंता आणि मानसिकता समजून घेत संवेदनशीलतेने उपचार करण्याची गरज असल्याचे सांगून डॉ. कराड म्हणाले, आधुनिक काळात डिजिटल दंतचिकित्सा, कृत्रिम बुद्धिमत्ता, अत्याधुनिक निदान पद्धती, इम्प्लांटोलॉजी तसेच विविध आधुनिक तंत्रज्ञानामुळे दंतचिकित्सा क्षेत्रात झपाट्याने बदल होत आहेत. या बदलांचा स्वीकार करताना दंतचिकित्सकांनी सातत्याने नवे ज्ञान आणि कौशल्य आत्मसात करावे. दंतआरोग्याबाबत जनजागृती आणि प्रतिबंधात्मक दंतचिकित्सेवर भर देण्याची गरज व्यक्त करताना डॉ. कराड यांनी दंतचिकित्सेतील आधुनिक तंत्रज्ञानाचा स्वीकार करताना विद्यार्थ्यांनी सुरुवातीपासूनच लूप्स, मायक्रोस्कोप आणि आधुनिक साधनांचा वापर करण्याची सवय लावून घ्यावी. यामुळे उपचारातील अचूकता आणि कौशल्य वाढण्यास मदत होईल, असे त्यांनी नमूद केले.
यावेळी डॉ. शेळके यांनी दंतचिकित्सा क्षेत्रातील आधुनिक तंत्रज्ञानाच्या वाढत्या वापराचे महत्त्व अधोरेखित केले. निदानातील अचूकता आणि उपचारांमधील सुस्पष्टता वाढविण्यासाठी तंत्रज्ञान महत्त्वपूर्ण ठरत असून, भविष्यात स्टेम सेल्स, रीजनेरेटिव्ह डेंटिस्ट्री आणि प्रिव्हेंटिव्ह डेंटिस्ट्री या क्षेत्रांमध्ये संशोधनाला मोठी संधी आहे, असे त्यांनी सांगितले. ‘इम्प्लांटॉलॉजी’नंतर आता ‘व्हॉट नेक्स्ट?’ या प्रश्नाचा शोध घेत पुढील पिढीतील दंतचिकित्सकांनी नव्या संशोधन क्षेत्रात पुढाकार घ्यावा. कार्यक्रमाचे प्रास्ताविक डॉ. गौरी उगले यांनी केले. सूत्रसंचालन सृष्टी पाटील व विष्णुप्रिया मालू यांनी केले, तर डॉ. तृप्ती गिरी यांनी आभार मानले.
