परभणी : जिल्हा शासकीय स्त्री रुग्णालयात वेळेत रुग्णवाहिका उपलब्ध न झाल्याने जिंतूर येथील गर्भवती महिला आणि तिच्या पोटातील बाळाचा मृत्यू झाल्याची घटना घडली होती. या प्रकरणाची आरोग्य विभागाने गंभीर दखल घेतली असून या प्रकरणात निष्काळजीपणाचा ठपका ठेवत रुग्णवाहिका सेवा पुरविणा-या सुमित कंपनीतील २ डॉक्टरांसह २ रुग्णवाहिका चालकांना सोमवारी रात्री निलंबित करण्यात आले आहे. या कारवाईमुळे परभणीच्या आरोग्य विभागात खळबळ उडाली आहे. दरम्यान या घटनेची सखोल चौकशी करण्यासाठी आरोग्य विभागाचे सहाय्यक संचालक दयानंद मोतीपवळे यांच्या अध्यक्षतेखाली ७ सदस्यीय विशेष चौकशी समिती नियुक्त करण्यात आली आहे.
या समितीने दि. १० ऑगस्ट रोजी सायंकाळी परभणीतील जिल्हा शासकीय स्त्री रुग्णालयात दाखल होत सदस्यांनी रुग्णालयाची प्रत्यक्ष पाहणी करून घटनेशी संबंधित विविध बाबींची माहिती घेत चौकशीला सुरुवात केली. मंगळवार, दि. ११ ऑगस्ट रोजी जिल्हा रुग्णालयातील जिल्हा शल्यचिकित्सकांच्या कक्षात संबंधित अधिकारी, कर्मचारी तसेच घटनेशी निगडित व्यक्तींचे जबाब नोंदविण्याची प्रक्रिया सुरू करण्यात आली. रुग्णवाहिका उपलब्ध होण्यास झालेला विलंब, संबंधित कर्मचा-यांची भूमिका, रुग्णवाहिका सेवेशी झालेला संपर्क आणि रुग्णाला वेळेत वैद्यकीय मदत मिळाली का, यासह विविध बाबींची समितीकडून पडताळणी करण्यात येत आहे. मयत महिलेच्या पतीसह नातेवाईकांचेही जबाब नोंदविण्यात आले आहेत.
या प्रकरणी रुग्णवाहिका सेवेतील डॉ. कुलदीप चोरमले, डॉ. अभिजीत इप्पर तसेच रुग्णवाहिका चालक मोहम्मद जलाल आणि केशव यादव यांच्यावर कारवाई करण्यात आली आहे. सुमित कंपनीच्या अधिका-यांनी या सर्वांच्या निलंबनाचे आदेश काढल्याची माहिती आहे. चौकशी समितीने संबंधितांची तब्बल २ तास कसून चौकशी केली. या घटनेच्या अनुषंगाने त्यांच्याकडून सविस्तर माहिती घेण्यात आली. रुग्णवाहिका सेवेत हलगर्जीपणा का झाला याचा शोध घेण्यावर समितीचा भर आहे. या प्रकरणातील अंतिम जबाबदारी निश्चित करण्यासाठी चौकशी समितीचा सविस्तर अहवाल महत्त्वाचा ठरणार आहे. त्यामुळे चौकशी समितीच्या अंतिम अहवालानंतर आणखी कोणावर कारवाई होते, याकडे सर्वांचे लक्ष लागले आहे.
