पूर्णो : शहरातील सर्व्हे क्रमांक २५/१ व २५/२ संदर्भातील कथित बेकायदेशीर नामांतर व हस्तांतरण प्रकरणामुळे पूर्णा नगर परिषद पुन्हा एकदा चर्चेत आली आहे. संबंधित प्रकरणात नियमबा पद्धतीने नामांतर झाल्याचा आरोप करण्यात येत आहे. या प्रक्रियेत सहभागी अधिकारी व कर्मचा-यांची सखोल चौकशी करण्याची मागणी नागरिकांकडून होत आहे.
याबाबत मिळालेल्या माहितीनुसार, नामांतर संदर्भातील वाढत्या तक्रारींची दखल घेत नगर परिषदेचे मुख्याधिकारी उत्कर्ष गुट्टे यांनी संबंधित नामांतराची नोंद रद्द केली आहे. मात्र, कथित बेकायदेशीर नामांतर प्रक्रिया करणा-या अधिकारी व कर्मचा-याविरूध्द अद्याप कोणतीही प्रशासकीय अथवा कायदेशीर कारवाई झालेली नसल्याने नागरिकांमध्ये तीव्र नाराजी व्यक्त केली जात आहे. जबाबदार असलेल्या अधिकारी व कर्मचा-यांची जबाबदारी निश्चित करून त्यांच्यावर कठोर कारवाई करण्यात यावी. ही प्रक्रिया कोणाच्या आदेशाने किंवा संमतीने पार पडली याचीही निष्पक्ष व सखोल चौकशी करावी अशी मागणी करण्यात येत आहे.
याशिवाय, पूर्णा नगर परिषदेत यापूर्वी अशा प्रकारची किती नामांतरे अथवा मालमत्ता हस्तांतरणाची प्रकरणे झाली आहेत त्यांचीही स्वतंत्र चौकशी करून संबंधित नोंदींची पडताळणी करावी अशी मागणी पुढे येत आहे. या संपूर्ण प्रकरणाची जिल्हाधिकारी यांनी गंभीर दखल घेऊन स्वतंत्र चौकशीचे आदेश द्यावेत. दोषी आढळणा-या अधिकारी व कर्मचा-यांवर कठोर कारवाई करावी अशी मागणी तक्रारदारांकडून करण्यात येत आहे.
