मुंबई : वानखेडेत आज मुंबई इंडियन्स आणि चेन्नई सुपर किंग्ज यांच्यात महामुकाबला रंगला. मुंबईने नाणेफेक जिंकल्यानंतर कर्णधार हार्दिक पंड्याने प्रथम गोलंदाजी करण्याचा निर्णय घेतला. चेन्नईकडून संजू सॅमसनला वगळता विशेष कोणत्याच फलंदाजांना जास्त धावा काढता आल्या नाहीत. संजूच्या वादळी शतकामुळे चेन्नईला २०७ धावांचा डोंगर उभारता आला. याउलट मुंबईला मात्र, १०४ धावा करता आल्या आणि चेन्नईने तब्बल १०३ धावांनी सामना जिंकला.
चेन्नईने प्रथम फलंदाजी करताना २० षटकांत २०७ धावांपर्यंत मजल मारली. चेन्नई सुपर किंग्सकडून संजू सॅमसनची फलंदाजी प्रभावी ठरली. त्याने ५४ चेंडूंमध्ये १० चौकार आणि ६ षटकारांसह नाबाद १०१ धावा केल्या. गायकवाडनेही २२ आणि ब्रेविसने २१ धावा केल्या. मुंबई इंडियन्सकडून गझनफर आणि अश्विन कुमार यांनी प्रत्येकी दोन बळी घेतले तर बुमराह आणि सँटनर यांनी प्रत्येकी एक बळी घेतला.
लक्ष्याचा पाठलाग करताना मुंबई इंडियन्सची सुरुवात खराब झाली. त्यांनी अवघ्या ११ धावांत तीन विकेट गमावल्या. त्यानंतर तिलक वर्मा आणि सूर्यकुमार यादव यांनी चौथ्या विकेटसाठी ७३ धावांची भागीदारी करून डाव सावरण्याचा प्रयत्न केला. तिलक वर्मा ३७ धावांवर बाद झाल्यानंतर मुंबई इंडियन्सने वेगाने विकेट गमावल्या, ज्यात सूर्याही ३६ धावांवर बाद झाला. मुंबई इंडियन्सचा डाव १९ षटकांत १०४ धावांवर संपला. हा आयपीएलच्या इतिहासातील त्यांचा सर्वात मोठा पराभव ठरला. चेन्नई सुपर किंग्सच्या गोलंदाजीवर अकील होसीनचे वर्चस्व होते. त्याने चार बळी घेतले तर नूर अहमदने दोन बळी घेतले. मुकेश चौधरी, अंशुल कंबोज, जेमी ओव्हरटन आणि गुर्जपनीत सिंग यांनी प्रत्येकी एक बळी घेतला. चेन्नईने विजय मिळविताच गुणतालिकेत मुसंडी मारली. त्यांनी १०३ धावांच्या फरकाने सामना जिंकताच आठव्या स्थानावरून थेट पाचव्या स्थानावर झेप घेतली तर मुंबई आठव्या स्थानावर गेली.
