लातूर : लातूर लोकसभा मतदारसंघासाठी आज सकाळी ७ वाजता मतदानाला सुरुवात झाली. पहाटे पाच वाजता मॉक पोल घेण्यात आले. लातूर शहरात सकाळी अनेक मतदान केंद्रांवर मतदारांच्या रांगा दिसून आल्या. उन्हाची तीव्रता अधिक असल्याने ब-याच जणांनी सकाळीच मतदान करणे पसंत केले. सकाळी ९ वाजेपर्यंत सुमारे ७.९१ टक्के एवढे मतदान झाले. तर १ वाजेपर्यंत ३२.७१ टक्के मतदान झाल्याचे जिल्हा निवडणूक विभागाने सांगितले.
भाजप महायुतीचे उमेदवार सुधाकर शृंगारे यांनी सकाळी लातूर येथील ‘कृपासदन’नजीक असलेल्या केंद्रावर मतदान केले. बाभळगाव येथे आमदार अमित देशमुख यांनी मतदान केले. लातूर लोकसभा मतदारसंघात १९ लाख ७७ हजार ४२ मतदार आहेत. २ हजार २१५ मतदान केंद्रांवर मतदान होत आहे. १६ हजार ७६५ कर्मचारी कार्यरत असून यात बीएलओ, चतुर्थश्रेणी कर्मचारी, अंगणवाडी सेविका, आरोग्य कर्मचारी, क्षेत्रीय अधिकारी आदींचा समावेश आहे.
प्रत्येक मतदार केंद्रावर पिण्याच्या पाण्याची व्यवस्था करण्यात आली आहे. ७८९ मतदान केंद्रांवर पेंडॉल टाकण्यात आले आहेत. तसेच मतदान केंद्रावर उपलब्ध असलेल्या खोलीत मतदारांना पंखा, पिण्याचे पाणी, बसण्यासाठी खुच्र्यांची व्यवस्था करण्यात आली आहे. मतदान पथक (२१२५), क्षेत्रीय अधिकारी २४२), स्थिर निगराणी पथके (२६), भरारी पथके (३४), व्हीडीओ संनिरीक्षण पथके (२४) व राखीव पथके (३०) या पथकांसाठी एकूण जीप ७९३, बसेस ३०१ यावर जीपीएस लावण्यात आलेली आहेत.
जिल्हाधिकारी कार्यालयातून निगराणी करण्यात येत आहे. मतदान केंद्राच्या सुरक्षेसाठी ३५६७ पोलिस कर्मचारी नियुक्त करण्यात आले आहेत. कायदा व सुव्यवस्थेसाठी बीएसएफ, एसआरपी, सीआरएफपी, एसआरपीची पथके तैनात केली आहेत. १६ मतदान केंद्रं संवेदनशील असून तेथे सुरक्षेच्या दृष्टीने योग्य त्या उपाययोजना करण्यात आल्या आहेत. शीघ्र कृति दल कार्यरत असून सीमा भागावरही विशेष लक्ष देण्यात आले आहे. १०६२ मतदान केंद्रांवर वेबकास्टिंग करण्यात येत आहे.
