भरधाव इरटिगाची थांबलेल्या आयशरला धडक, ३ मित्रांचा मृत्यू, दोघे गंभीर
सोलापूर : प्रतिनिधी
भरधाव इरटिगा कार रस्त्यावर थांबविलेल्या आयशर वाहनाला पाठीमागून धडकून झालेल्या भीषण अपघातात कारमधील दोघे मित्र जागेवर ठार झाले तर तिघे गंभीर जखमी झाले. तिघांपैकी एक जणाचा खाजगी दवाखान्यात उपचारादरम्यान सकाळी मृत्यू झाला. हा भीषण अपघात बुधवारी मध्यरात्री १ वाजता पुणे-हैदराबाद बायपास मार्गावरील डी मार्ट-पर्ल गार्डन जवळ घडला.
अमोल धैर्यशील येरटे (४० वर्ष, रा. दाळगे प्लॉट, भवानी पेठ, सोलापूर), शेखर सुरेकर (३३ वर्ष, रा. कुमठा नाका, सोलापूर) आणि कादर सैदू हांडे (३३ वर्ष, रा. कुमठा नाका, सोलापूर) अशी अपघातात ठार झालेल्या तिघा मित्रांची नावे असून त्यातील कादर सैदू हांडे याचा एका खासगी रुग्णालयात उपचारादरम्यान मृत्यू झाला तर स्वरुप कोथींबिरे (२७ वर्ष, जुनी मिल चाळ, सोलापूर) आणि अमित राजेश जाधव (३० वर्ष, रा. पांडुरंग वस्ती, शास्त्रीनगर, सोलापूर) अशी जखमींची नावे आहेत.
वरील पाचही मित्र हे मध्यरात्री पुना नाका येथील एका ढाब्यावर जेवण करून इरटिका कार (क्रमांक एमएच १३ ईके ७२०१) मधून घराकडे जात होते. त्यावेळी त्यांची कार हैदराबाद बायपास रस्त्यावरील डी मार्ट-पर्ल गार्डनजवळ उभ्या असलेल्या आयशरवर (क्रमांक एमएच १३ सीयू ८६९९) पाठीमागून आदळली. या भीषण अपघातात दोघे जण जागीच ठार झाले तर तिघेजण गंभीर जखमी झाले. जखमींना एका खाजगी दवाखान्यात दाखल करण्यात आले. अपघाताची तीव्रता इतकी भीषण होती की, इरटिगा कार तब्बल दीडशे मीटर फरफटत जाऊन त्यावरील पत्र्याचे छत पूर्ण कापले गेले.
दरम्यान अपघाताची खबर समजताच जोडभावी पेठ पोलिस ठाण्याचे पथक घटनास्थळी पोहोचून मृतदेह शव विच्छेदनासाठी पहाटे येथील शासकीय रुग्णालयात दाखल केले. यातील मयत शेखर सुरेकर हा अविवाहित असून तो एका खासगी फायनान्स कंपनीत कामास होता. त्याच्या पश्चात आई आणि दोन विवाहित बहिणी असा परिवार आहे. दुसरा मयत अमोल येरटे हा अक्कलकोट रोडवरील आदर्श सुझुकीमध्ये सिनिअर मॅनेजर म्हणून कामाला होता. त्याच्या पश्चात आई, वडील, पत्नी आणि दोन मुले असा परिवार आहे. तसेच तिसरा मयत कादर हांडे हा आदर्श सुझुकीमध्ये मॅनेजर म्हणून काम करत होता. त्याच्या पश्चात आई-वडील, पत्नी, दोन मुली आणि एक मुलगा असा परिवार असल्याची माहिती नातेवाईकांनी दिली.
