नवी दिल्ली: अयोध्येतील भव्य राम मंदिर देणगी अपहार प्रकरणात दररोज नवनवे धक्कादायक खुलासे समोर येत असून, या प्रकरणामुळे देशभरात तीव्र संताप आणि नाराजी व्यक्त केली जात आहे. या प्रकरणाच्या चौकशीची व्याप्ती वाढली असून, श्रीराम जन्मभूमी तीर्थक्षेत्र ट्रस्टचे माजी सरचिटणीस चंपत राय, अनिल मिश्रा आणि गोपाल राव यांना या प्रकरणात कधीही अटक केली जाऊ शकते, असे कयास आता वर्तवले जात आहेत.
राम मंदिरातील नैवेद्य आणि देणगी चोरी प्रकरणाचा तपास करण्यासाठी स्थापन केलेल्या विशेष तपास पथकाने (SIT) अयोध्येत सुमारे आठ तास प्रदीर्घ चौकशी व तपास केला. या दरम्यान ट्रस्टच्या अनेक वरिष्ठ अधिकाऱ्यांची कसून चौकशी करण्यात आली. या तपासात मंदिरातील देखभाल कामगार म्हणून संशयितांना प्रवेश पास देणारा मुख्य आरोपी अनुकल्प मिश्रा याच्याबाबत मोठा खुलासा समोर आला आहे. भाजपचे ज्येष्ठ नेते आणि बजरंग दलाचे संस्थापक विनय कटियार यांनी या प्रकरणावर गंभीर भाष्य करताना, देणगीच्या पैशांचा अपहार झाला असल्याचे स्पष्ट आहे, असे म्हटले आहे. तसेच आपण या संवेदनशील विषयावर थेट पंतप्रधान नरेंद्र मोदी यांच्याशी सविस्तर चर्चा केल्याचे सांगत चंपत राय, गोपाल राव आणि अनिल मिश्रा यांना आगामी काळात अटक होऊ शकते, असा खळबळजनक दावा त्यांनी केला आहे.
दुसरीकडे, या प्रकरणातील आणखी एक आरोपी राम शंकर यादव उर्फ टिन्नू यादव याचा भाऊ दिनेश यादव याने पहिल्यांदाच प्रसारमाध्यमांसमोर येत गंभीर आरोप केले आहेत. चंपत राय आणि अनिल मिश्रा यांनी स्वतःचा बचाव करण्यासाठी आपल्या भावाला या प्रकरणात खोट्या आरोपाखाली अडकवले असून टिन्नू यादव पूर्णपणे निर्दोष असल्याचा दावा दिनेशने केला आहे.
दरम्यान, या संपूर्ण वादामुळे आणि भ्रष्टाचाराच्या आरोपांमुळे लागलेल्या कलंकामुळे चंपत राय कमालीचे अस्वस्थ असून त्यांनी आपल्या निकटवर्तीयांकडे तीव्र नाराजी व्यक्त केली आहे. अयोध्येतील माझी सेवा आता पूर्ण झाली असून यापुढे तिथे काम करण्याची माझी अजिबात इच्छा नाही, असे सांगत चंपत राय सध्या एकांतात गेले आहेत. आपला मोठा विश्वासघात झाल्याची भावनाही त्यांनी बोलून दाखवली आहे. या पार्श्वभूमीवर, आपल्या पदांचे राजीनामे दिलेले चंपत राय आणि ट्रस्टचे सदस्य अनिल मिश्रा यांच्या भवितव्याबाबतचा अंतिम निर्णय ६ जुलै रोजी होणाऱ्या श्रीराम जन्मभूमी तीर्थक्षेत्र ट्रस्टच्या अत्यंत महत्त्वाच्या बैठकीत दोन-तृतीयांश बहुमताने घेतला जाण्याची दाट शक्यता आहे.
