नांदेड : प्रतिनिधी
राज्यात पुकारण्यात आलेल्या महाराष्ट्र बंदच्या पार्श्वभूमीवर उद्या २३ जुलै रोजी दुपारी १२ वाजता जिल्हाधिकारी कार्यालयासमोर तीव्र निदर्शने करण्यात येणार असल्याची माहिती आयोजकांनी दिली आहे.
या आंदोलनात डावी लोकशाही आघाडी, संविधानवादी आघाडी, महाविकास आघाडी, आंबेडकरवादी पक्ष व संघटना, विविध पुरोगामी पक्ष, विद्यार्थी, युवक, महिला, शेतकरी, शेतमजूर, कामगार संघटना तसेच इतर सामाजिक संघटनांचा सहभाग असणार आहे.
आयोजकांनी सर्व नागरिक, सामाजिक कार्यकर्ते आणि विविध संघटनांच्या पदाधिक-यांना महाराष्ट्र बंदमध्ये सक्रिय सहभाग नोंदवून दुपारी १२ वाजता जिल्हाधिकारी कार्यालयासमोर होणा-या निदर्शनात उपस्थित राहण्याचे आवाहन केले आहे.
यावेळी विद्यार्थ्यांवर झालेला लाठीमार, शांततेच्या मागार्ने सुरू असलेल्या आंदोलनाचे दमण यासह इतर प्रश्नांवर शासनाचे लक्ष वेधण्यासाठी घोषणाबाजी व शांततापूर्ण आंदोलन करण्यात येणार असल्याचेही आयोजकांनी स्पष्ट केले. महाराष्ट्र बंद यशस्वी करण्यासाठी सर्व घटकांनी एकजुटीने सहभागी व्हावे, असे आवाहन आंदोलनकर्त्यांच्या वतीने करण्यात आले आहे.
