अनंतनाग : दक्षिण कश्मीरमधील अनंतनागमध्ये गस्त घालणा-या पोलिसांवर बुधवारी दहशतवाद्यांनी हल्ला केला. या हल्ल्यात एक कॉन्स्टेबल गंभीर जखमी झाला. जखमी कॉन्स्टेबलला तात्काळ उपचारासाठी रुग्णालयात नेण्यात आले, तिथे उपचारादरम्यान त्याचा मृत्यू झाला. आशिक हुसेन कुरेशी असे शहिद कॉन्स्टेबलचे नाव आहे. या घटनेनंतर परिसरात सुरक्षा व्यवस्था कडक करण्यात आली आहे.
कुरेशी हे अनंतनागच्या लाल चौक परिसरात कोकरनाग रस्त्यावर कर्तव्यावर होते. यादरम्यान एका वाहनातून आलेल्या दहशतवाद्यांनी कुरेशी यांना लक्ष्य करत त्यांच्यावर अंदाधुंद गोळीबार केला. या हल्ल्यात आशिक हुसेन घटनास्थळीच गंभीर जखमी होऊन कोसळले. हल्ल्यानंतर हल्लेखोर तात्काळ घटनास्थळावरून पळून गेले. सहकारी जवान आणि स्थानिकांच्या मदतीने त्यांना उपचारासाठी जवळच्या जीएमसी अनंतनाग रुग्णालयात दाखल करण्यात आले.
दहशतवाद्यांच्या गंभीर जखमी झाल्याने रुग्णालयात उपचारादरम्यान कुरेशी यांचा मृत्यू झाला. शहीद हेड कॉन्स्टेबल आशिक हुसेन कुरेशी (बेल्ट क्र. २०, आयआर ३ बटालियन) हे बडगामच्या बिरू भागातील रहिवासी होते. पोलिस प्रशासनाकडून नियमांनुसार पुढील वैद्यकीय-कायदेशीर कार्यवाही केली जात आहे.
हल्ल्याची माहिती मिळताच, अतिरिक्त पोलिस आणि लष्करी तुकड्या घटनास्थळी दाखल झाल्या. सुरक्षा दलांनी संपूर्ण लाल चौक आणि आजूबाजूचा परिसर सील केला आहे. हल्ला करणा-या दहशतवाद्यांना पकडण्यासाठी परिसरात शोधमोहीम सुरू करण्यात आली आहे.
