बांकीपूर/दतिया : वृत्तसंस्था
देशात कॉकरोच जनता पार्टीचे आंदोलन झाल्याने सामान्यांमध्ये सत्ताधा-यांमध्ये रोष निर्माण झालेला असतानाच देशात बिहारसह काही राज्यांत विधानसभेची पोटनिवडणूक लागली. यात बिहारमधील बांकीपूरची निवडणूक सर्वाधिक चर्चेत राहिली. कारण हा भाजपचा बालेकिल्ला होता. भाजपचे राष्ट्रीय अध्यक्ष नितीन नवीन यांचा गड असलेल्या या मतदारसंघात भाजपचा दारुण पराभव झाला. येथे जनसुराज्यचे प्रशांत किशोर विजयी झाले. यासोबतच मध्य प्रदेशातही भाजपला एक जागा गमवावी लागली. फक्त गुजरातमध्ये त्यांना विजय साकारता आला. त्यामुळे भाजपसाठी हा फार मोठा धक्का मानला जात आहे.
बिहारमधील बांकीपूर विधानसभा मतदातसंघातील पोटनिवडणुकीत जनसुराज्य पक्षाचे प्रमुख प्रशांत किशोर यांनी भाजपला मोठा धक्का देत सनसनाटी विजय मिळवला. भाजपचे राष्ट्रीय अध्यक्ष नितीन नवीन यांच्या परंपरागत मतदारसंघात प्रशांत किशोर यांनी भाजपाचे उमेदवार निरज कुमार यांच्यावर १९ हजारांहून अधिक मतांचे मताधिक्य घेत विजय मिळवला. भाजपासाठी प्रतिष्ठेच्या असलेल्या या पोटनिवडणुकीत जनसुराज्य पक्षाचे प्रमुख प्रशांत किशोर यांनी चांगलीच रंगत आणली. या मतदारसंघात भाजप, राजद आणि जनसुराज्य या पक्षांत तिरंगी लढत झाली. मतदानानंतर आज मतमोजणी झाली. यात प्रशांत किशोर यांनी सुरुवातीपासून आघाडी मिळवली. ३२ व्या फेरीअखेर प्रशांत किशोर यांनी आपली आघाडी १९ हजारांहून अधिक वाढवत आपला विजय निश्चित केला.
मध्य प्रदेशात कॉंग्रेसचे घनश्याम सिंह विजयी
भाजपाची सत्ता असलेल्या मध्य प्रदेशात काँग्रेसने सत्ताधारी भाजपाला मोठा धक्का दिला. दतिया विधानसभा मतदारसंघातील पोटनिवडणुकीत काँग्रेसचे उमेदवार घनश्याम सिंह यांनी भाजपाच्या आशुतोष तिवारी यांना धूळ चारली. पहिल्या फेरीत तिवारी यांनी आघाडी घेतली होती. मात्र नंतर काँग्रेसचे उमेदवार घनश्याम सिंह यांनी आघाडी घेतली आणि ६ हजार १६ मतांनी दणदणीत विजय मिळविला.
गुजरातमध्ये भाजप विजयी
गुजरातमधील वडोदरा जिल्ह्यातील मांजळपूर विधानसभा मतदारसंघाच्या पोटनिवडणुकीत भाजपचे उमेदवार सतेंद्रभाई पटेल उर्फ सतीश पटेल यांनी ३०,६३० मतांच्या मोठ्या फरकाने विजय मिळवला. या निवडणुकीत सतीश पटेल यांना ५५,४८१ मते मिळाली तर काँग्रेसचे उमेदवार भीखा रबारी यांना २४,८५१ मते मिळाली.
