तेहरान : इराणचे सर्वोच्च नेते मोजतबा खामेनेई यांच्या प्रकृतीबाबत आणि त्यांच्या अनुपस्थितीबद्दल जगभरात सुरू असलेल्या तर्कवितर्कांना इराणच्या अधिकृत सरकारी वृत्तसंस्थेने विराम देण्याचा प्रयत्न केला आहे. इराणची सरकारी वृत्तसंस्थेने मोजतबा खामेनेई यांचा एक नवा व्हीडीओ जारी केला असून, यामध्ये ते अत्यंत निरोगी आणि तब्येतीने उत्तम दिसत आहेत. इस्रायली मीडिया आणि पाश्चात्य माध्यमांनी मोजतबा खामेनेई यांची प्रकृती अत्यंत गंभीर असल्याचे दावे केले होते. या सर्व अफवा आणि दावे फेटाळण्यासाठीच इराणी प्रशासनाने हा व्हीडीओ सार्वजनिक केल्याचे मानले जात आहे.
समोर आलेल्या व्हीडीओमध्ये मोजतबा खामेनेई एका गादीवर बसलेले दिसत आहेत. त्यांच्या समोर काही लोक बसले असून, ते त्यांच्याशी अगदी सहजपणे संवाद साधत आहेत. व्हीडीओमध्ये ते पूर्णपणे स्वस्थ आणि तंदुरुस्त दिसत आहेत. हा व्हीडीओ नेमका कोणत्या तारखेचा आणि वेळचा आहे, याची अधिकृत पुष्टी अजून करण्यात आलेली नाही.
इस्रायली मीडियाचे काय दावे होते?
शुक्रवारी इस्रायली मीडियामध्ये मोजतबा खामेनेई यांच्या प्रकृतीबाबत अत्यंत धक्कादायक दावे करण्यात आले होते. इस्रायलच्या चॅनेल १४ आणि द यरुशलम पोस्टने इराणी प्रशासनाच्या जवळच्या सूत्रांचा हवाला देत खामेनेई यांना रुग्णालयात दाखल करण्यात आल्याचे व त्यांची प्रकृती चिंताजनक असल्याचे म्हटले होते. यरुशलम पोस्टने एका सूत्राच्या हवाल्याने तर थेट असा दावा केला होता की जर लवकरच त्यांच्या मृत्यूची बातमी आली तर नवल वाटायला नको.
विदेशी मीडियाचे दावे
इराणचे राष्ट्राध्यक्ष मसूद पेजेश्कियान यांनी नुकत्याच दिलेल्या एका सरकारी टीव्ही मुलाखतीत मान्य केले होते की सध्याच्या परिस्थितीत मोजतबा खामेनेई यांच्याशी थेट संपर्क साधणे अत्यंत कठीण जात आहे. मात्र, त्यांची उपस्थिती हीच देशासाठी सर्वात मोठी ताकद असल्याचे त्यांनी सांगितले होते. विदेशी माध्यमे आणि देशांतरित सौदी वृत्तवाहिनी अल-हदथने तर खामेनेई सध्या इराणमध्ये हजरच नाहीत, असा दावा केला होता. या सर्व पार्श्वभूमीवर इराणने हा व्हीडीओ जारी करून मोजतबा खामेनेई सुरक्षित आणि स्वस्थ असल्याचा संदेश जगाला दिला आहे.
