हिंगोली : प्रतिनिधी
हिंगोली पोलिस दलातून आज सकाळी २९ ऑगस्ट रोजी खळबळ उडवून देणारी बातमी समोर आली आहे. पोलिस अधिका-याने रेल्वे समोर उडी मारत आत्महत्या केली. खाकी वर्दीमध्येच पोलिस उपनिरीक्षकाने आत्महत्या केल्यामुळे एकच खळबळ उडाली आहे. अमोल गांगणवाड असं या पोलिस अधिका-याचे नाव होते. ते हिंगोली पोलिस दलामध्ये पोलिस नियंत्रण कक्षात ते कार्यरत होते.
मिळालेल्या माहितीनुसार, हिंगोली जिल्हा पोलिस दलातील नियंत्रण कक्षात रुजू असलेले पोलिस उपनिरीक्षक अमोल गंगलवाड (वय ५० वर्षे) यांनी आत्महत्या केली. आज सकाळी साडेआठ वाजताच्या सुमारास धावत्या ट्रेनसमोर उडी मारत त्यांनी आयुष्य संपवलं. पूर्णा येथून अकोलाकडे जाणा-या ट्रेनची ते वाट पाहत होते. ट्रेन जवळ येताच त्यांनी उडी मारली. या घटनेत गंभीर जखमी झालेल्या पोलिस उपनिरीक्षकाचा जागीच मृत्यू झाला.
या घटनेची माहिती रेल्वेचे लोकोपायलट यांनी हिंगोली रेल्वे स्टेशन मास्टर यांना दिली. त्यानंतर शहर पोलिसांना कळविण्यात आले. दरम्यान पोलिस अधिका-याच्या आत्महत्येची माहिती मिळताच हिंगोलीचे पोलिस अधीक्षक श्रेणिक लोढा, अतिरिक्त पोलीस अधीक्षक कमलेश मीना यांच्यासह पोलिस अधिका-यांनी तातडीने घटनास्थळी धाव घेतली. त्यांनी पोलिस उपनिरीक्षक अमोल गंगलवाड यांचा मृतदेह ताब्यात घेत शवविच्छेदनासाठी रुग्णालयात पाठवला.
२ महिन्यापूर्वी परभणी पोलिस दलातून हिंगोली पोलिस दलात बदली झालेले पोलिस उपनिरीक्षक अमोल गंगलवाड मनमिळाऊ स्वभावाचे होते. कर्तव्यदक्ष असलेल्या पोलिस अधिका-याने आत्महत्या का केली? याचे कारण अद्याप समजू शकले नाही. घटनास्थळावर पोलिसांना सुसाईड नोट सापडली नाही. पोलिस या घटनेचा सखोल तपास करत आहे.
