मुंबई : प्रतिनिधी
छत्रपती शिवाजी महाराजांचे शौर्य, दूरदृष्टी आणि प्रेरणादायी कारकीर्द मोठ्या पडद्यावर मांडणारे अभिनेता-दिग्दर्शक रितेश विलासराव देशमुख यांचा ‘राजा शिवाजी’ हा चित्रपट आता टेलिव्हिजनवर प्रेक्षकांच्या भेटीला येणार आहे. जिओ स्टुडिओज आणि मुंबई फिल्म कंपनी निर्मित या चित्रपटाचा वर्ल्ड टीव्ही प्रीमियर १२ सप्टेंबरला रात्री ८ वाजता स्टार गोल्डवर होणार आहे.
विशेष म्हणजे, निवडक केबल आणि डीटीएच ऑपरेटरवर प्रेक्षकांना ‘राजा शिवाजी’ हिंदी आणि मराठी या दोन्ही भाषांमध्ये पाहता येणार आहे. त्यामुळे प्रेक्षकांना आपल्या आवडीच्या भाषेत ही ऐतिहासिक कथा अनुभवता येणार आहे.
‘राजा शिवाजी’मध्ये रितेश देशमुख यांनी छत्रपती शिवाजी महाराजांची भूमिका साकारण्यासोबतच चित्रपटाचे दिग्दर्शनही केले आहे. महाराजांचे शौर्य, नेतृत्व, दूरदृष्टी आणि त्यांच्या आयुष्यातील महत्त्वाचे प्रसंग या चित्रपटातून मोठ्या पडद्यावर मांडण्यात आले आहेत.
चित्रपटात रितेश देशमुख यांच्यासोबत संजय दत्त, अभिषेक बच्चन, विद्या बालन, महेश मांजरेकर, सचिन खेडेकर, बोमन इराणी, भाग्यश्री, फरदीन खान, जितेंद्र जोशी, अमोल गुप्ते आणि जिनिलिया देशमुख हे कलाकार महत्त्वाच्या भूमिकांमध्ये आहेत.
‘राजा शिवाजी’च्या भव्यतेमध्ये चित्रपटाचे संगीतही महत्त्वाची भूमिका बजावते. अजय-अतुल यांनी चित्रपटाला संगीत दिले असून, संतोष सिवन यांनी सिनेमॅटोग्राफीची जबाबदारी सांभाळली आहे.
जिनिलिया देशमुख यांनीही या प्रीमियरबद्दल उत्साह व्यक्त केला. छत्रपती शिवाजी महाराजांचे जीवन आणि त्यांची कारकीर्द प्रेक्षकांसमोर आणणे ही अभिमानाची गोष्ट असल्याचे त्यांनी म्हटले.
माझ्यासाठी मोठा सन्मान : रितेश देशमुख
वर्ल्ड टीव्ही प्रीमियरबद्दल रितेश देशमुख यांनी आनंद व्यक्त केला. ‘राजा शिवाजी’ हा केवळ एक चित्रपट नसून प्रत्येक भारतीयाच्या अभिमानाची गोष्ट असल्याचे त्यांनी म्हटले. छत्रपती शिवाजी महाराजांची भूमिका साकारणे आणि त्यांची कथा दिग्दर्शित करणे ही आपल्यासाठी मोठी जबाबदारी असल्याचेही त्यांनी सांगितले.
१२ सप्टेंबरला घरबसल्या अनुभवता येणार
थिएटरनंतर आता ‘राजा शिवाजी’चा वर्ल्ड टीव्ही प्रीमियर होणार आहे. १२ सप्टेंबरला रात्री ८ वाजता स्टार गोल्डवर प्रेक्षकांना हा चित्रपट पाहता येणार आहे. हिंदी आणि मराठी अशा दोन्ही भाषांचा पर्याय असल्याने कुटुंबासोबत हा ऐतिहासिक चित्रपट पाहण्याची संधी प्रेक्षकांना मिळणार आहे.
