चंद्रपूर : बंगालच्या उपसागरात गेल्या महिनाभरात तयार झालेले अक्वान हे तिसरे मोठे चक्रीवादळ शुकवार दि. २० नोव्हेंबर रोजी उत्तर आंध्र प्रदेश आणि दक्षिण ओडिशाच्या किनारपट्टीवर धडकत आहे. या चक्रीवादळाचा थेट तडाखा पूर्व किनारपट्टीला बसत असला, तरी त्याचे अप्रत्यक्ष परिणाम महाराष्ट्रात प्रकर्षाने जाणवू लागले आहेत. भारतीय हवामानशास्त्र विभागाने दिलेल्या इशा-यानुसार, राज्यातील विदर्भ, मराठवाडा आणि मध्य महाराष्ट्राच्या काही भागांत ढगाळ वातावरण निर्माण झाले असून पावसाची शक्यता वर्तवण्यात आली आहे.
बंगालच्या उपसागरात निर्माण झालेल्या आणि रौद्र रूप धारण केलेल्या अक्वान चक्रीवादळाचा फटका आता महाराष्ट्रालाही बसू लागला आहे. आंध्र प्रदेश आणि ओडिशाच्या किनारपट्टीकडे सरकणा-या या चक्रीवादळाच्या प्रभावामुळे राज्याच्या हवामानात मोठे बदल झाले असून विदर्भातील चंद्रपूरसह अनेक जिल्ह्यांत वादळी वा-यासह अवकाळी पावसाने हजेरी लावली आहे. ऐन रब्बी हंगामाच्या तोंडावर आणि काढणीला आलेल्या पिकांवर पावसाचे सावट पसरल्याने बळीराजाची चिंता पुन्हा एकदा वाढली आहे.
चक्रीवादळाचा सर्वाधिक प्रभाव पूर्व विदर्भात दिसून येत आहे. चंद्रपूर जिल्ह्यातील मूल परिसरात आज सकाळपासूनच सोसाट्याच्या वा-यासह मुसळधार पावसाने हजेरी लावली. अचानक आलेल्या या पावसामुळे नागरिकांची चांगलीच तारांबळ उडाली असून सखल भागांत पाणी साचल्याचे चित्र पाहायला मिळाले. नागपूर, गडचिरोली, भंडारा आणि गोंदिया या जिल्ह्यांतही दिवसभर ढगाळ वातावरण असून हलक्या ते मध्यम स्वरूपाच्या सरी कोसळण्याचा अंदाज हवामान विभागाने वर्तवला आहे.
थंडी गायब, संमिश्र हवामानामुळे आजार बळावले
नोव्हेंबरच्या मध्यात राज्यात गुलाबी थंडीची चाहूल लागली होती. मात्र, ‘अक्वान’ चक्रीवादळामुळे बाष्पयुक्त वारे राज्याकडे आल्याने किमान तापमानात वाढ झाली असून थंडी काहीशी गायब झाली आहे. कोकण आणि मुंबई परिसरात कोरडे व उष्ण हवामान असले तरी, मध्य महाराष्ट्र आणि मराठवाड्यात पहाटे धुके, दुपारी उकाडा आणि सायंकाळी ढगाळ वातावरण अशी विचित्र स्थिती निर्माण झाली आहे. या बदलत्या हवामानाचा फटका नागरिकांच्या आरोग्यावर होत असून सर्दी, खोकला आणि तापाच्या रुग्णांमध्ये वाढ झाली आहे.
शेतीपिकांचे नुकसान होण्याची भीती
अवकाळी पाऊस आणि वादळी वा-यामुळे शेतक-यांच्या तोंडचे पाणी पळाले आहे. विदर्भातील धान (भात) उत्पादक शेतक-यांचे पीक सध्या काढणीच्या किंवा मळणीच्या अवस्थेत आहे. तसेच कापूस आणि तूर पिकालाही या ढगाळ वातावरणाचा आणि पावसाचा मोठा फटका बसण्याची भीती आहे. मराठवाडा आणि मध्य महाराष्ट्रात रब्बी हंगामातील हरभरा आणि ज्वारीच्या पेरण्या सुरू असतानाच हवामानाने रंग बदलल्याने बळीराजा हवालदिल झाला आहे.
















