मॉस्को : गेल्या जवळपास चार वर्षांपासून रशिया आणि युक्रेनमध्ये संघर्ष सुरू आहे. युक्रेन-रशिया हे दोन्ही देश एकमेकांच्या शहरांवर हवाई हल्ले करत आहेत. या युद्धाचा परिणाम फक्त या दोन्ही देशांवरच होत नसून याचा जगाला फटका बसत आहे. रशिया-युक्रेनमधील संघर्ष थांबवण्यासाठी अमेरिकेनेही प्रयत्न केले. मात्र, तरीही या युद्धाबाबत कोणताही ठोस तोडगा निघालेला नाही. या घडामोडी दरम्यान आता एक मोठी माहिती समोर आली आहे.
युक्रेन युद्धाशी संबंधित एका आंतरराष्ट्रीय प्रकरणाच्या कायदेशीर लढ्याची धुरा रशियाने भारताचे माजी सरन्यायाधीश धनंजय चंद्रचूड यांच्यावर सोपवली असल्याची माहिती समोर आली आहे. आता आंतरराष्ट्रीय लवादात धनंजय चंद्रचूड हे रशियाची बाजू मांडणार आहेत. हे प्रकरण युक्रेनच्या ओशचाडबँक या सरकारी बँकेच्या संदर्भातील असल्याची माहिती सांगितली जाते. भारताचे माजी सरन्यायाधीश धनंजय चंद्रचूड यांच्यावर रशियाने विश्वास दाखवत एक मोठी जबाबदारी सोपवली आहे. युक्रेनच्या ओशचाडबँक या सरकारी बँकेच्या संदर्भातील वादाच्या पार्श्वभूमीवर धनंजय चंद्रचूड हे महत्वाची भूमिका बजावणार आहेत. या संदर्भातील वृत्त दिले आहे.
वृत्तानुसार, युक्रेनच्या ओशचाडबँक या सरकारी बँकेने रशियाच्या विरोधात एक याचिका आंतरराष्ट्रीय लवादात दाखल केली आहे. हे आंतरराष्ट्रीय लवाद या प्रकरणावर आता सुनावणी घेत आहे. हे संपूर्ण प्रकरण रशिया आणि युक्रेन यांच्यातील युद्ध आणि लष्करी कारवायांमुळे बँकेच्या कामकाजावर झालेला कथित परिणाम आणि त्यामुळे झालेल्या नुकसानीच्या संबंधित आहे.
हे प्रकरण युक्रेनमधील डोनेत्स्क, लुहान्स्क, खेरसन आणि झापोरिझिया या प्रदेशांमधील ओशचाडबँकेची मालमत्ता आणि व्यावसायिक कामकाज यांच्याशी संबंधित बँकेच्या दाव्याशी निगडित आहे. २०२२ मध्ये रशियाने केलेल्या मोठ्या प्रमाणावरील आक्रमणामुळे आणि त्यानंतर युक्रेनमध्ये झालेल्या लष्करी कारवाईमुळे कथितपणे बँकेचे मोठ्या प्रमाणात नुकसान झाल्याचा दावा करण्यात आलेला आहे. दरम्यान, ग्लोबल आर्बिट्रेशन रिव् ूच्या एका अहवालानुसार, डी.वाय.चंद्रचूड हे युक्रेनच्या सरकारी मालकीच्या ओशचाडबँकने दाखल केलेल्या वादावर सुनावणी करणा-या आंतरराष्ट्रीय लवादात रशियाचे प्रतिनिधित्व करणार आहेत.
