नांदेड : पंजाबचे माजी उपमुख्यमंत्री आणि शिरोमणी अकाली दलाचे अध्यक्ष सुखबीरसिंह बादल यांच्यावर गुरुवारी नांदेड येथील प्रसिद्ध सचखंड गुरुद्वारा परिसरात एका अज्ञात इसमाने तलवारीने हल्ला केल्याची धक्कादायक घटना घडली. या अचानक झालेल्या हल्ल्यात बादल यांच्या डाव्या हाताला दुखापत झाली असून, त्यांना तातडीने उपचारासाठी शहरातील यशोसाई रुग्णालयात दाखल करण्यात आले आहे. या घटनेमुळे गुरुद्वारा परिसर आणि संपूर्ण शहरात एकच खळबळ उडाली आहे.
मिळालेल्या माहितीनुसार, सुखबीरसिंह बादल हे आपली पत्नी तथा खासदार हरसिमरत कौर बादल यांच्यासह बुधवारी धार्मिक दर्शनासाठी नांदेडमध्ये दाखल झाले होते. गुरुवारी सकाळी गुरुद्वारा परिसरात दर्शन घेत असताना निहंग पोशाखात आलेल्या एका इसमाने त्यांच्यावर शस्त्राने (तलवारीने) अचानक वार केला. सुरक्षा रक्षक आणि उपस्थितांनी तत्परता दाखवल्याने मोठा अनर्थ टळला; मात्र यात बादल यांच्या डाव्या हाताला दुखापत झाली.
पोलिस बंदोबस्तात वाढ, एकाला ठोकल्या मुसक्या
घटनेची माहिती मिळताच नांदेड पोलिसांनी घटनास्थळी धाव घेत परिस्थिती नियंत्रणात आणली. हल्ला करणा-या संशयित आरोपीला पोलिसांनी तत्काळ ताब्यात घेतले आहे. हल्ल्याचे नेमके कारण काय? आरोपीचा बादल यांच्याशी काही जुना विवाद होता का? अथवा यामागे काही राजकीय/धार्मिक षड्यंत्र आहे का, याचा कसून तपास पोलिस करत आहेत.
परिस्थिती नियंत्रणात
घटनेच्या पार्श्वभूमीवर खबरदारीचा उपाय म्हणून सचखंड गुरुद्वारा परिसर आणि यशोसाई हॉस्पिटलच्या बाहेर कडक पोलिस बंदोबस्त तैनात करण्यात आला आहे. सध्या परिसरातील वातावरण शांत मात्र तणावपूर्ण असून नागरिकांनी आणि भाविकांनी कोणत्याही अफवांवर विश्वास ठेवू नये असे आवाहन पोलीस प्रशासनाकडून करण्यात आले आहे. दरम्यान, यशोसाई हॉस्पिटलमध्ये सुखबीरसिंह बादल यांच्यावर वैद्यकीय उपचार सुरू असून त्यांची प्रकृती स्थिर असल्याची प्राथमिक माहिती आहे. त्यांच्या प्रकृतीबाबत लवकरच रुग्णालयाकडून अधिकृत वैद्यकीय बुलेटिन जारी केले जाण्याची शक्यता आहे.
