नवी दिल्ली : दिल्लीत कॉक्रोच जनता पार्टीच्या आंदोलनावेळी मोफत अन्न वाटप करणा-या मोहम्मद जुनैद यांना दिल्ली पोलिसांनी ताब्यात घेतले होते, असा आरोप जुनैद यांनी स्वत: केला आहे. यानंतर जुनैद यांना सीजेपीकडून कायदेशीर मदत मिळत नसल्याचा दावा करणारे अनेक व्हीडीओ सोशल मीडियावर व्हायरल होऊ लागले आहेत. याप्रकरणी आता सीजेपीच्या प्रवक्त्या रत्ना सिंह यांनी स्पष्टीकरण दिले आहे. मोहम्मद जुनैद यांच्याबाबत पसरवल्या जाणा-या बातम्या आणि अफवा खोट्या आहेत, असे सिंह यांनी म्हटले आहे.
कॉक्रोच जनता पार्टीच्या जंतर मंतरवरील आंदोलनावेळी मोहम्मद जुनैद यांनी आंदोलकांना मोफत अन्न वाटप केले होते. जुनैद यांच्या या कृतीचे देशात सर्वत्र कौतुक झाले. दरम्यान, जुनैद यांना दिल्ली पोलिसांनी ताब्यात घेतले होते, असे त्यांनी सांगितल्यानंतर सीजेपीकडून सहकार्य होत नसल्याचे आरोप देखील होऊ लागले आहेत. यावर सीजेपीकडून स्पष्टीकरण देण्यात आले आहे. मोहम्मद जुनैद यांच्याबाबत पसरवल्या जाणा-या बातम्या आणि अफवा खोट्या आहेत. जुनैद सुखरुप आहेत आणि त्यांना सर्व आवश्यक कायदेशीर मदत पुरवली जात आहे. सर्व स्वयंसेवक थोड्या वेळापूर्वच एकत्र जमले होते, तिथेही ते हजर होते असे सिंह यांनी पोस्ट करुन स्पष्टीकरण दिले आहे.
जुनैद यांच्या नातेवाईकांनाही ताब्यात घेतल्याचा दावा
चुकीची माहिती पसरवू नका असे आम्ही सर्वांना आवाहन करतो, त्यांच्या घरावर करण्यात आलेल्या कारवाईची आम्ही तात्काळ दखल घेतली होती. आम्ही नेहमीच जुनैद यांना खूप आदराने वागवले आहे आणि आम्ही कायमच त्यांच्यासोबत (आणि इतर स्वयंसेवकांच्या) उभे राहू असे रत्ना सिंह यांनी म्हटले आहे. दरम्यान, सीजेपीच्या गाझियाबादमधील एका आंदोलकाने जुनैद यांच्या कुटुंबीयांना पोलिसांनी गाझियाबादमध्ये ताब्यात घेतले आणि मेरठमध्ये त्याच्या नातेवाईकांचा छळ केल्याचा आरोप केला आहे.
