वॉशिंग्टन डीसी : अमेरिकन अध्यक्ष डोनाल्ड ट्रम्प यांनी इराणसोबत युद्ध सुरू असले तरी अमेरिकेकडे शस्त्रास्त्रांचा कोणताही तुटवडा नसल्याचे ठणकावून सांगितले आहे. आमच्याकडे जगात सर्वाधिक शस्त्रे आहेत. आमच्या गरजेपेक्षाही जास्त, असे ते म्हणालेत.
इराणसोबत सुरू असलेल्या संघर्षामुळे अमेरिकेकडील पॅट्रियट इंटरसेप्टर क्षेपणास्त्रांचा साठा कमी होत असल्याच्या माध्यमांतील वृत्तांनंतर ट्रम्प यांनी हे विधान केले आहे. या विधानानंतर लगेचच, ट्रम्प यांनी त्यांच्या ट्रुथ सोशल या सोशल मीडिया प्लॅटफॉर्मवर एआय-निर्मित अनेक प्रतिमा शेअर केल्या. एका प्रतिमेत इराणचे सर्वात मोठे तेल निर्यात केंद्र असलेल्या खारग बेटावरील हवाई हल्ला दाखवण्यात आला होता; त्यांनी त्याला खार्गवर हल्ला असे शीर्षक दिले. त्यानंतर त्यांनी आणखी एआय प्रतिमा पोस्ट केल्या, ज्यात अमेरिकेचा ध्वज फडकवणारे एक इराणी तेलवाहू जहाज दाखवण्यात आले होते. दुस-या प्रतिमेत ते जहाज हवेत उडताना दाखवण्यात आले होते, ज्यासोबत आता इंजिन नाहीत असे शीर्षक होते.
अमेरिकेचे हल्ले थांबले; इराणचाही कारवाई स्थगित
अमेरिकेने सलग तीन रात्री इराणवर कोणतेही हल्ले केलेले नाहीत. त्यानंतर, इराणनेही अमेरिकन तळ आणि हितसंबंधांवर करण्यात येणारे प्रत्युत्तरादाखल हल्ले थांबवण्याची घोषणा केली. चर्चेसाठी वाव मिळावा म्हणून हे हल्ले थांबवण्यात आल्याचे ट्रम्प यांनी सांगितले.
होर्मुझच्या सामुद्रधुनीत तेल टँकरचा स्फोट
होर्मुझच्या सामुद्रधुनीत एका सागरी सुरुंगाला धडकल्यामुळे तेल टँकरचा स्फोट झाला. प्राथमिक माहितीनुसार, हा टँकर आपल्या निर्धारित सागरी मार्गावरून भरकटला होता.
कच्च्या तेलाच्या दरात घसरण
आंतरराष्ट्रीय बाजारात ब्रेंट आणि यूएस क्रूड (अमेरिकन कच्चे तेल) या दोन्हीच्या दरात ५ टक्क्यांहून अधिक घट नोंदवण्यात आली.
नेतान्याहू ट्रम्प यांच्या भेटीसाठी अमेरिकेला जाणार
इस्रायलचे पंतप्रधान बेंजामिन नेतान्याहू हे राष्ट्राध्यक्ष ट्रम्प यांची भेट घेण्यासाठी अमेरिकेला जाणार आहेत. संघर्ष सुरू झाल्यापासून या दोन नेत्यांमधील ही पहिलीच प्रत्यक्ष भेट असेल.
