नाशिक : प्रतिनिधी
विविध स्वरूपाच्या गुन्ह्यांत अटक केलेल्या संशयितांना पोलिस कोठडीत असताना मिळणा-या डब्यात आता मांसाहाराचाही समावेश करण्यात आला आहे. संशयितांच्या मागणीनुसार नव्हे, तर पुरवठादाराला सूचित केलेल्या दिवसांनुसार ठराविक वेळेस मांसाहाराचा ‘पाहुणचार’ देण्यात येत आहे.
सर्व भाज्या व डाळींचा डब्यात वापर करून आजारी असलेल्या संशयितांना दूध पुरविण्याचे निर्देशही आयुक्तालयाने दिले आहेत. या तरतुदींनुसार संबंधित कंत्राटदाराने संशयितांना डबा देण्यास प्रारंभ केल्याचेही सूत्रांनी सांगितले. पोलिस आयुक्तालयाच्या तेरा पोलिस ठाण्यांत दाखल विविध गुन्ह्यातील संशयितांना पोलिस कोठडीदरम्यान पोलिस ठाण्यातील तुरुंगात ठेवण्यात येते. सरकारवाडा, पंचवटी, आडगाव, सातपूर, मुंबई नाका, भद्रकाली, गंगापूर, इंदिरानगर, म्हसरूळ व अंबड या पोलिस ठाण्यांतील तुरुंगांत संशयित असतात.
त्यावेळी संशयितांना कैदीभत्ता पुरविण्यासाठी सिडकोतील व्यक्तीला आयुक्तालयाने कंत्राट दिले आहे. ३० सप्टेंबर २०२४ पर्यंत अटी-शर्तींनुसार संबंधित ठेकेदाराला पोलिस ठाण्यातील संशयितांना जेवण पुरवावे लागेल. दोन्ही वेळेच्या एका डब्याकरिता ७८ रुपये प्रतिदिन सर्व करांसह असा दर आयुक्तालयाने निश्चित केलेला आहे. डब्यात सर्व प्रकारच्या भाज्यांचा आणि वरणाकरिता सर्व प्रकारच्या डाळींचा आलटून पालटून वापर करावा. ज्यावेळी संशयिताला मांसाहारी डबा पुरविण्यात येईल, त्यावेळी वरण आणि इतर भाजी न देण्याची सूचनाही आयुक्तालयाने केली आहे.
ठेकेदाराला कैदीभत्ता पुरवठा नाकारता येणार नाही. कैदीभत्ता व्यवस्थित पुरविला जातोकिंवा नाही, याची खात्री करण्याची जबाबदारी संबंधित पोलिस ठाण्याच्या वरिष्ठ निरीक्षकांची असेल. कैदीभत्त्यासंदर्भात तुरुंग कक्षातील वहीत नोंद करण्याचे आदेशही आयुक्तालयाने दिले आहेत. त्यामुळे ठेकेदाराने पुरविलेल्या डब्यातील पदार्थांच्या गुणवत्तेवर पोलिसांचे लक्ष राहणार आहे.
आहाराचे निकष
भाज्या : २५० ग्रॅम
वरण : १५० ग्रॅम
चपाती किंवा भात : ६०० ग्रॅम
मटण (वरण, भाजीच्या बदल्यात) : २५० ग्रॅम
दूध (आजारी संशयितास) : १ लिटर (शासकीय डेअरीनुसार)
चहा आणि बनपाव : दिवसातून दोनवेळा
अडचणी दूर होण्याची अपेक्षा
पोलिस ठाण्यातील तुरुंगात असलेल्या बहुतांश संशयितांना घरून डबा येतो. पोलिसांच्या परवानगीने ठराविक वेळेस हा डबा संशयितांना दिला जातो. यापूर्वी ठेकेदारामार्फत अपेक्षित डबा किंवा मांसाहार फारसा दिलाच नसल्याचे काही वरिष्ठ पोलिस अधिका-यांचे व कर्मचा-यांचे निरीक्षण आहे. विशेषत: सायंकाळी उशिरा एखाद्या संशयिताला ताब्यात घेतल्यास किंवा अटक केल्यास त्याच्या जेवणासाठी डबा उपलब्ध नसतो. त्यामुळे पोलिसांना स्वत: संशयिताच्या जेवणाची व्यवस्था करावी लागते.
