सोलापूर : बार्शी शहर भगवंत मंदिरासाठी प्रसिद्ध आहे. भगवान विष्णूला समर्पित आणि बाराव्या शतकातील या हेमाडपंती शैलीतील मंदिराचा विकास आराखडा प्रशासनाकडे सादर झालेला आहे. हा आराखडा राज्य शिखर समितीकडे आल्यानंतर त्यात प्रस्तावित केलेली कामे व निधीप्रमाणे शासनाकडून मंजुरी देण्यात येईल अशी ग्वाही मुख्यमंत्री देवेंद्र फडवणीस यांनी दिली.
बार्शी येथील श्री भगवंत मंदिर येथे श्री भगवंत प्रकट दिनानिमित्त आयोजित महापूजा मुख्यमंत्री देवेंद्र फडवणीस यांच्या हस्ते करण्यात आली. बार्शी शहरात प्रधानमंत्री आवास योजना, रमाई आवास योजनेंतर्गत घरकुल लाभार्थ्यांना मुख्यमंत्र्यांच्या हस्ते घराच्या चावीचे वितरण करण्यात आले. यावेळी पालकमंत्री जयकुमार गोरे, सोलापूर जिल्हा परिषदेचे अध्यक्ष दीपक वैद्य, धाराशीव जिल्हा परिषदेच्या अध्यक्षा अर्चना पाटील, माजी आमदार राजेंद्र राऊत, सोलापूर जिल्हाधिकारी कार्तिकियेन एस., बार्शी नगरपरिषदेच्या नगराध्यक्ष तेजस्वीनी कथले आदी मान्यवर उपस्थित होते.
सांस्कृतिक ठेवा जनतेपर्यंत आणण्यासाठी आराखड्याला मंजुरी
विष्णु पुराणातही या परिसराचा उल्लेख आढळून येतो. प्राचीन काळापासून आलेल्या लोकपरंपरा, अध्यात्म, ऐतिहासिक, सांस्कृतिक ठेवा जपणे हे गरजेचे आहे. या सांस्कृतिक ठेव्याला जनतेपर्यंत आणण्यासाठी तयार करण्यात आलेल्या आराखड्याला मान्यता देण्यात येईल. श्री भगवंत मंदिर तीर्थ क्षेत्र विकास आराखड्यातून या भागाचा विकास करण्यात येणार आहे, असे मुख्यमंत्री देवेंद्र फडवणीस म्हणाले.
