मुंबई : प्रतिनिधी
रेल्वे तिकिटाचे ऑनलाईन आरक्षण करताना येणारे अनावश्यक पॉपअप्स, वारंवार भरावा लागणारा कॅप्चा आणि तिकीट बुक होण्यासाठी लागणारा प्रदीर्घ वेळ यामुळे त्रस्त झालेल्या प्रवाशांचा हा त्रास कायमचा दूर करण्यासाठी रेल्वे प्रशासनाने आयआरसीटीसीच्या तिकिट बुकिंग सुविधेत आमूलाग्र बदल करण्याचा निर्णय घेतला आहे. तिकिट बुकिंगची प्रक्रिया अधिक सोपी, वेगवान आणि सुरक्षित करण्यासाठी आयआरसीटीसीच्या संकेतस्थळाची एक सुधारित बीटा आवृत्ती तयार करण्यात आली असून, ती लवकरच प्रवाशांच्या सेवेत येणार असल्याची माहिती रेल्वे प्रशासनाने दिली.
काही दिवसांपूर्वी जयपूर येथील मालवीय नॅशनल इन्स्टिट्यूट ऑफ टेक्नॉलॉजीच्या विद्यार्थ्यांनी आयआरसीटीसीच्या संकेतस्थळावरील अनेक गंभीर त्रुटी रेल्वे प्रशासनाच्या निदर्शनास आणून दिल्या होत्या. यानंतर रेल्वेने तातडीने पावले उचलत १५ जुलैपर्यंत या संकेतस्थळात सुधारणा करण्याचे आश्वासन दिले होते. त्यानुसार आयआरसीटीसी आणि रेल्वे सूचना प्रणाली केंद्राच्या अधिका-यांनी जयपूरमध्ये या विद्यार्थ्यांसमोर नवीन संकेतस्थळाची बीटा आवृत्ती सादर केली असून त्यावर विद्यार्थ्यांचे अभिप्राय मागवले आहेत.
प्रवाशांचा बुकिंगचा अनुभव सुलभ करण्यासाठी नवीन आवृत्तीत महत्त्वाचे बदल करण्यात आले आहेत. यात तिकीट बुक करताना मध्येच येणारे अनावश्यक कॅप्चा, पॉपअप्स आणि जड ग्राफिक्स काढून टाकण्यात आले आहेत. प्रवाशांना आता सर्व वर्गांमधील उपलब्ध जागांची माहिती वेगवेगळ््या पर्यायांवर न जाता एकाच स्क्रीनवर पाहता येईल. तिकीट बुक करण्यासाठी लागणा-या पाय-या कमी करण्यात आल्या आहेत, ज्यामुळे अवघ्या काही सेकंदांत तिकिट बुक होईल. जे प्रवासी वारंवार प्रवास करतात, त्यांना प्रवाशांची माहिती पुन्हा पुन्हा टाईप करावी लागणार नाही. ती माहिती एकदाच सेव्ह राहील.
आरक्षण यंत्रणेचा कायापालट
आयआरसीटीसीचे हे नवीन संकेतस्थळ रेल्वेच्या जवळपास ४० वर्षे जुन्या पॅसेंजर रिझर्व्हेशन इंजिन या प्रणालीशी जोडण्याचे काम सध्या अंतिम टप्प्यात आहे. ही जुनी आरक्षण यंत्रणा समांतर पद्धतीने पूर्णपणे अपडेट केली जात आहे. त्यामुळे संपूर्ण क्षमतेने काम करणारे हे नवीन आयआरसीटीसी पोर्टल पुढील काही महिन्यांत अधिकृतपणे लाँच केले जाईल, असे रेल्वे अधिका-यांनी स्पष्ट केले.
देशातील सर्वांत मोठे तिकिट बुकिंग अॅप
रेल्वेच्या अधिकृत रेलवन या अॅपने ४ कोटी डाउनलोड्सचा टप्पा पार केला असून, ते देशातील सर्वात मोठे रेल्वे तिकीट बुकिंग अॅप बनले आहे. या अॅपवर तात्काळ बुकिंगच्या वेळी होणारा बॉट्सचा बेकायदेशीर वापर रोखण्यासाठीही रेल्वे विशेष सुरक्षा यंत्रणा राबवत आहे. हे सर्व महत्त्वाचे बदल मालवीय नॅशनल इन्स्टिट्यूटच्या विद्यार्थ्यांच्या अभ्यासपूर्ण सूचनांमुळेच शक्य झाल्याचे रेल्वे अधिका-यांनी आवर्जून नमूद केले.
