हिंगोली : शहरात जिल्हाधिका-यांच्या निवासस्थानच्या अंगणातील चंदनाचे झाड चोरट्यांनी पळविल्याची घटना घडली आहे. याप्रकरणी सोमवारी ता. ११ हिंगोली शहर पोलिस ठाण्यात गुन्हा दाखल झाला आहे. पोलिसांनी सीसीटीव्ही फुटेजवरून चोरट्यांची ओळख पटविण्याचे प्रयत्न चालविले आहे.
हिंगोली शहरात जिल्हाधिकारी राहुल गुप्ता यांचे निवासस्थान आहे. या ठिकाणी त्यांच्या सुुरक्षेसाठी पोलिस बंदोबस्तही ठेवण्यात आला असून दर आठ तासांना दोन कर्मचारी कर्तव्यावर येतात. या शिवाय अंगणातील झाडांची देखभाल करण्यासाठी एक माळीकाम करणा-या कर्मचा-याचीही नियुक्ती आहे.
दरम्यान, रविवारी ता. १० रात्री नेहमी प्रमाणे पोलिस कर्मचारी कर्तव्यावर होते. मध्यरात्रीच्या सुमारास चोरट्यांनी निवासस्थानाच्या परिसरात प्रवेश करून त्या ठिकाणी असलेले चंदनाचे झाड तोडून नेले. मात्र या घटनेची कानोकान खबरही त्या ठिकाणी बंदोबस्तावर असलेल्या कर्मचा-याला लागली नाही.
दरम्यान, आज सकाळी त्या ठिकाणी माळी काम करणारे शिवप्रसाद शिंदे हे आल्यानंतर त्यांना चंदनाचे झाड दिसले नाही. त्यांनी सदर प्रकार जिल्हाधिकारी गुप्ता यांच्या कानावर टाकला. तसेच शहर पोलिसांनाही या घटनेची माहिती देण्यात आली. पोलिस निरीक्षक संदीप मोदे, जमादार पोटे, अशोक धामणे, संतोष करे, गणेश लेकुळे, गणेश वाबळे, शेख मुजीब यांच्या पथकाने घटनास्थळी भेट देऊन पाहणी केली.
त्यानंतर सीसीटीव्ही फुटेजची तपासणी केली असता दोन ते तीन जण झाडाच्या जवळ असल्याचे दिसून आले आहे. मात्र सीसीटीव्ही मध्ये त्यांचे चेहरे स्पष्ट दिसत नसल्याचे सुत्रांनी सांगितले. त्यामुळे या परिसरात असलेल्या सीसीटीव्ही फुटेजवरून चोरट्यांची ओळख पटविण्याचे प्रयत्न सुरु झाले आहेत.
या घटनेमुळे पोलिस दलासह जिल्हा प्रशासनात एकच खळबळ उडाली असून यापुर्वीही एक चंदनाचे झाड चोरीला गेल्याची घटना घडली होती. त्या चोरीचा अद्यापही तपास लागला नाही त्यानंतर ही दुसरी घटना घडली आहे.
