मुंबई : प्रतिनिधी
किरकोळ कारणावरून सुरू झालेला वाद कसा गंभीर मारहाणीपर्यंत जाऊ शकतो, याचे धक्कादायक उदाहरण मुंबईत समोर आले आहे. माजी क्रिकेटपटू आणि खासदार युसूफ पठाण यांच्या नातलगांचा या प्रकरणात समावेश असून त्यांच्या सास-यासह मेहुण्याला पोलिसांनी अटक केली आहे.
रस्त्यावर पाणी साचलेले असताना एक कार त्या पाण्यातून गेली आणि उडालेल्या पाण्याचे शिंतोडे युसूफ खान नावाच्या व्यक्तीवर उडाले. या कारणावरून दोन्ही बाजूंमध्ये वाद निर्माण झाला. सुरुवातीला तोंडी वाद सुरू असला तरी काही वेळातच हा वाद चिघळत गेला. यामध्ये युसूफ पठाण यांचा मेहुणा शोएब खान याने हस्तक्षेप करत युसूफ खान यांच्यावर हल्ला केल्याचा आरोप करण्यात आला आहे.
घटनेनंतर तक्रार देण्यासाठी निघालेल्या युसूफ खान यांच्यावर पुन्हा हल्ला झाल्याची माहिती समोर आली आहे. त्यांच्या म्हणण्यानुसार, ते पोलिस ठाण्याकडे जात असताना पठाण यांचे सासरे खालिद खान आणि इतर नातेवाईकांनी त्यांना अडवून पुन्हा मारहाण केली. त्यामुळे परिस्थिती अधिकच गंभीर झाली आणि वादाने हिंसक रूप धारण केले.
या मारहाणीत आरोपींकडून काठ्या आणि बेसबॉल बॅटचा वापर करण्यात आल्याचा आरोप आहे. या हल्ल्यात तक्रारदाराच्या कुटुंबातील काही सदस्यांना गंभीर दुखापत झाली आहे. घटनेची माहिती मिळताच पोलिसांनी तत्काळ कारवाई करत खालिद खान आणि शोएब खान यांना अटक केली.
