पुणे : प्रतिनिधी
पुण्यात काल रात्रीपासून मुसळधार पावसाने झोडपून काढले आहे. शहरात झाडपडीच्या घटना समोर येत आहेत. अनेक भागात रस्त्यांना नदीचे स्वरूप आले आहे. तसेच ग्रामीण भागातही पावसाने धूमाकूळ घातला आहे. अशातच मावळ तालुक्यातून एक धक्कादायक घटना समोर आली आहे. आज पहाटे ६ च्या सुमारास एका घरावर दरड कोसळली आहे.
मिळविलेल्या माहितीनुसार, मावळ तालुक्यातील पाटण गावात आज (६ जुलै) पहाटे एका घरावर दरड कोसळल्याची घटना घडली आहे. प्राथमिक माहितीनुसार, संबंधित घरातील संपूर्ण कुटुंब ढिगा-याखाली अडकल्याची शक्यता व्यक्त करण्यात आली आहे. जिल्हा आपत्ती व्यवस्थापन अधिकारी , पुणे यांनी दिलेल्या माहितीनुसार, घटनेची माहिती मिळताच मावळचे तहसीलदार घटनास्थळी दाखल झाले असून बचावकार्य सुरू करण्यात आले आहे.
या घटनेच्या पार्श्वभूमीवर राष्ट्रीय आपत्ती प्रतिसाद दलच्या पुणे येथील ५व्या बटालियनची मदत मागविण्यात आली आहे. त्यानुसार निरीक्षक रविंदर यांच्या नेतृत्वाखाली पथक आवश्यक आपत्ती व्यवस्थापन साहित्यांसह घटनास्थळाकडे रवाना झाले. सध्या बचावकार्य सुरू असून, अधिकृतरीत्या कोणतीही जीवितहानी झाल्याची नोंद झालेली नाही.
