मुंबई : प्रतिनिधी
मुंबई महागर पालिकेतील उधळपट्टीचा नवीन प्रकार समोर आलाय. महापालिकेतील पदाधिका-यांना स्कॉर्पिओऐवजी आता इनोव्हा क्रिस्टा हवीय. कारण काय तर स्कॉर्पिओ एन गाड्यांमधून प्रवास करताना धक्के बसतात, पाठ दुखते. त्यामुळेच या पदाधिका-यांनी इनोव्हा क्रिस्टा गाड्यांची मागणी केली. त्यानुसार उपमहापौर, सभागृह नेते, विरोधी पक्षनेते आणि ३ समिती अध्यक्षांसाठी २५ लाखांच्या इनोव्हा गाड्या मागवण्यात आल्या आहेत.
हा प्रस्ताव लवकरच महापालिका आयुक्त अश्विनी भिडे यांच्याकडे मंजुरीसाठी पाठवला जाणार आहे. महापालिकेत नवनिर्वाचित महापौर, उपमहापौर आणि विविध समित्यांच्या अध्यक्षांची नियुक्ती झाल्यानंतर त्यांना प्रशासनाकडून वाहने उपलब्ध करून देण्यात आली होती. यामध्ये महापौर रितू तावडे यांच्या सेवेसाठी सुमारे ३० ते ३५ लाख रुपयांची ‘इनोव्हा हायक्रॉस हायब्रीड’ गाडी देण्यात आली आहे. तर उपमहापौर, सभागृह नेते, विरोधी पक्षनेते आणि विविध वैधानिक समित्यांच्या अध्यक्षांसाठी ‘स्कॉर्पिओ एन’ वाहने देण्यात आली आहेत. मात्र, देण्यात आलेली ‘स्कॉर्पिओ एन’ ही गाडी प्रवासासाठी सोयीची वाटत नसल्याची थेट तक्रार सभागृह नेते गणेश खणकर यांनी केली आहे. त्यामुळे आता सभागृह नेते, विरोधी पक्षनेते, उपमहापौर आणि तीन वैधानिक समित्यांच्या अध्यक्षांसाठी पुन्हा नव्या ‘इनोव्हा क्रिस्टा’ गाड्या खरेदी करण्याची मागणी जोर धरू लागली आहे.
मुंबई महापालिकेने महापौर-उपमहापौर त्यासोबतच विरोधी पक्षनेते, सभागृहनेते त्यासोबत विविध समित्यांचे अध्यक्ष यांच्यासाठी महापालिका महापौर निवडणूक होण्याआधी फेब्रुवारी महिन्यात तेरा गाड्यांची खरेदी केली होती… ही प्रक्रिया प्रशासकीय राजवट असताना पार पडली. ज्यामध्ये महापौरांसाठी एक इनोव्हा हाय क्रॉस हायब्रीड गाडी व इतर उपमहापौर सभागृह नेते, विरोधी पक्षनेते आणि विविध समित्यांचे अध्यक्ष यांच्यासाठी १२ स्कॉर्पिओ एन गाड्यांची खरेदी करण्यात आली. इनोव्हाची किंमत ३० लाख रुपये, तर एका स्कॉर्पिओची किंमत १८ लाख रुपये आहे, असा एकूण दोन कोटी १६ लाख रुपये खर्च या वाहनांवर करण्यात आला.
सहा महिन्यांपूर्वीच केला होता २ कोटी १६ लाखांचा खर्च!
विशेष म्हणजे, महापालिकेत प्रशासकीय राजवट असताना निवडणूक होण्यापूर्वी म्हणजेच जानेवारी-फेब्रुवारी महिन्यातच महापालिकेच्या घनकचरा व्यवस्थापन विभागाने पदाधिका-यांसाठी १३ नवीन वाहनांची खरेदी केली होती. या १३ वाहनांवर महापालिकेने तब्बल २ कोटी १६ लाख रुपये खर्च केले होते. महापालिकेत गेल्या पावणेचार वर्षांपासून नगरसेवक आणि अध्यक्ष नसल्यामुळे पूर्वीची वाहने अधिकारी वापरत होते. त्यामुळे निवडणूक झाल्यानंतर महापालिकेत नगरसेवक, कार्यकर्ते आणि नागरिकांची वर्दळ वाढल्याने पदाधिका-यांसाठी ही नवी वाहने खरेदी करण्यात आली होती.
जनतेच्या पैशांची उधळपट्टी?
अवघ्या ६ महिन्यांपूर्वी कोट्यवधी रुपये खर्च करून खरेदी केलेल्या ‘स्कॉर्पिओ एन’ गाड्या बाजूला सारून पुन्हा महागड्या ‘इनोव्हा क्रिस्टा’ गाड्यांची मागणी केली जात असल्याने आश्चर्य व्यक्त होत आहे. अवघ्या काही महिन्यांतच पुन्हा नव्या गाड्यांच्या खरेदीचा प्रस्ताव तयार केला जात असल्याने महापालिकेच्या या उधळपट्टीवर आता प्रश्नचिन्ह उपस्थित केले जात आहे.
किशोरी पेडणेकरांचा संताप
या प्रकरणी बोलताना माजी महापौर किशोरी पेडणेकर म्हणाल्या, मी यावरून दोन-तीन गोष्टींवर प्रकाश टाकेन. यामध्ये ५४ गाड्या घेतल्या. काही गाड्या वॉर्ड अध्यक्ष यांना दिल्या. आयुक्त यांना देखील यातील गाड्या दिल्या आहेत. आम्हाला ज्या गाड्या दिल्या तिचे अॅव्हरेज ७-८आहे. गाडी बरोबर नाही, पाठ दुखते असे काहीजण म्हणतायत. गाडी मुंबईच्या बाहेर न्यायची असते तेव्हा आयुक्तांची परवानगी लागते. मी महापौर असताना दोन वेळा गाडी बाहेर घेऊन गेले होते, आताही मी बाहेर गाडी घेऊन जात नाही. अशा पद्धतीने पालिकेची लूटमार करत असतील तर योग्य नाही.
