उमेदवारीसाठी रस्सीखेच

शिंदे सेनेची आज बैठक, राष्ट्रवादीतही इच्छुकांची गर्दी
मुंबई : प्रतिनिधी
उपमुख्यमंत्री एकनाथ शिंदे यांनी विधानपरिषद निवडणुकीच्या पार्श्वभूमीवर उद्या शिवसेनेची बैठक बोलावली आहे. या बैठकीत विविध मुद्यांवर चर्चा होण्याची शक्यता आहे. या बैठकीत विधानपरिषद निवडणुकीसाठी शिवसेनेच्या दोन उमेदवारांच्या नावांबाबत अंतिम निर्णय होऊ शकतो. या बैठकीत एकनाथ शिंदे भूमिका स्पष्ट करणार असल्याची माहिती देण्यात आली. शिंदेंच्या बैठकीत संजय गायकवाड यांच्या वक्तव्यांबाबतही चर्चा होण्याची शक्यता आहे. दरम्यान, राष्ट्रवादीतही एका जागेसाठी जवळपास ७० जण इच्छुक असून, जय पवार यांच्याही नावाची चर्चा रंगली आहे. त्यामुळे शिवसेना आणि राष्ट्रवादीत उमेदवारीसाठी रस्सीखेच सुरू आहे.

दरम्यान, उपमुख्यमंत्री एकनाथ शिंदे यांनी शिवसेनेची विधानपरिषद निवडणुकीच्या पार्श्वभूमीवर महत्त्वाची बैठक बोलावली आहे. या बैठकीला पक्षाचे नेते, उपनेते, महत्वाचे लोकप्रतिनिधी आणि प्रमुख पदाधिकारी यांची उपस्थिती राहणार आहे. शिवसेनेची बैठक उद्या संध्याकाळी नंदनवन या निवासस्थानी होणार आहे. उद्या होणा-या बैठकीत विधान परिषद निवडणूक या हा विषय केंद्रस्थानी असणार आहे.

महाराष्ट्राच्या विधानपरिषदेच्या ९ जागांसाठी निवडणूक होणार आहे तर एका जागेसाठी पोटनिवडणूक जाहीर झाली आहे. विधानसभेतील सदस्यांच्या संख्याबळानुसार शिवसेनेच्या वाट्याला दोन जागा येणार आहेत. शिवसेनेकडे ५७ आमदार असल्याने सेनेच्या दोन जागा निवडून येऊ शकतात. यामुळे ते कोणाला संधी देतात, याकडे सर्वांचे लक्ष लागले आहे. त्यातच राष्ट्रवादी कॉंग्रेस पक्षातही विधान परिषदेच्या जागेसाठी रस्सीखेच सुरू असून, अनेक दावेदार असल्याने उमेदवारी कोणाला द्यायची, याबाबत पेच निर्माण झाला आहे.

पक्षांतर्गत नाराजी?
विधानपरिषद निवडणुकीसाठी एकनाथ शिंदे यांच्या शिवसेनेकडून नीलम गो-हे आणि बच्चू कडू यांच्या नावांची चर्चा सुरु होती. नीलम गो-हे यांच्या नावाला विरोध करणारे पुण्यातील महिलाचे एक पत्र व्हायरल झाले होते तर बच्चू कडू यांना संधी द्यायची असल्यास त्यांच्या प्रहार जनशक्ती पार्टीचे शिवसेनेत विलिनीकरण करून घ्यावे, अशी भूमिका शिवसेनेतील काही नेत्यांनी घेतली होती. त्यावरही या बैठकीत चर्चा होऊ शकते.

बच्चू कडूंचा प्रहार
शिवसेनेत विलीन?
विधान परिषद निवडणुकीसाठी एकनाथ शिंदे यांच्या शिवसेनेकडून देण्यात आलेल्या प्रस्तावासंदर्भात प्रहार जनशक्ती संघटनेचे सर्वेसर्वा बच्चू कडू यांच्याकडून येत्या काही तासांत अंतिम निर्णय घेतला जाण्याची शक्यता आहे. एकनाथ शिंदे यांनी बच्चू कडू यांना शिवसेनेत प्रवेश करुन विधान परिषदेची निवडणूक लढवण्याची ऑफर दिली होती. बच्चू कडू हे शिवसेनेत नसल्याने त्यांना विधान परिषदेची उमेदवारी देण्यास पक्षातील अनेकांनी विरोध केला. त्याऐवजी बच्चू कडू यांना त्यांची प्रहार जनशक्ती संघटना शिवसेनेत विलीन करायला सांगावी, अशी भूमिका शिवसेनेतील काही नेत्यांनी घेतली. या पार्श्वभूमीवर बच्चू कडू आणि मंत्री उदय सामंत यांच्यात महत्त्वपूर्ण चर्चा झाल्याचे समजते. या बैठकीत प्रहार जनशक्ती पक्ष हा शिवसेनेत विलीन करण्यासंदर्भात बराच खल झाल्याचे समजते.

भाजपचे धक्कातंत्र,
६ उमेदवार जाहीर
शिवसेना, राष्ट्रवादीची उमेदवारीसाठी रस्सीखेच सुरू असताना भाजपने धक्कातंत्र वापरत विधानपरिषद निवडणुकीसाठी ५ नावांची घोषणा केली. त्यामध्ये काँग्रेसमधून भाजपात आलेल्या प्रज्ञा सातव यांना पोटनिवडणुकीसाठी उमेदवारी दिली. यासोबतच माजी आमदार स्नेहलता कोल्हेंचे चिरंजीव विवेक कोल्हेंसह सुनिल कर्जतकर, माधवी नाईक, संजय भेंडे आणि प्रमोद जठार या नव्या चेह-यांना संधी देत प्रादेशिक संतुलन साधले. प्रमोद जठार हे सिंधुदुर्गमधील भाजप नेते आहेत.