परभणी : शहरातील जालना रस्त्यांवरील मालेगाव पाटी परिसरात दि. २५ जुलै रोजी मध्यरात्री एका अज्ञात वाहनाच्या धडकेत दुचाकीस्वार गंभीर जखमी झाल्याची घटना घडली. या दुचाकीस्वारावर ग्रामीण रूग्णालयात प्रथमोपचार करण्यात आले. परंतू जखमीची प्रकृती गंभीर असल्याने पुढील उपचारासाठी जिल्हा रुग्णालयात पाठविण्यात आले आहे.
याबाबत सविस्तर माहिती अशी की, जालना जिल्ह्यातील मंठा तालुक्यातील अंभोत शेळके येथील रहिवासी असलेले विष्णू अशोक फड जिंतूरहून मंठ्याकडे दुचाकीवरून शनिवारी रात्री १२ वाजताच्या सुमारास जात होते. मालेगावपाटी जवळ त्यांच्या दुचाकीला अज्ञात वाहनाने जोरदार धडक दिल्याने ते रक्तबंबाळ अवस्थेत रस्त्यावर पडले होते. १०८ रुग्णवाहिका चालक एकनाथ पवार व डॉ. अरुण लाहोटी, नागेश आकात यांनी त्यांना पाहताच तात्काळ घटनास्थळावरुन ग्रामीण रुग्णालयात उपचारासाठी दाखल केले. तेथे वैद्यकीय अधिकारी डॉ. शेख अजीस यांनी प्राथमिक उपचार केले.
जखमी फड यांची प्रकृती चिंताजनक असल्याने जिल्हा रुग्णालयात उपचारासाठी हलविण्यात आले आहे. अज्ञात वाहनचालक घटनास्थळावरून वाहनांसह फरार झाला आहे. याप्रकरणी वृत्त लिहिपर्यंत पोलिसांत कोणतीही नोंद झाली नव्हती.
दरम्यान परभणी ते छ. संभाजीनगर जाणा-या महामार्गावर सातत्याने अपघाताच्या घटना घडत आहेत. विशेषत: जिंतूर ते परभणी महामार्गावर सातत्याने घडणा-या अपघातांच्या घटनामुळे वाहन चालक जीव मुठीत घेवून वाहने चालवित आहेत. या महामार्गावरील अपघात रोखण्यासाठी ठिकठिकाणी गतिरोधक उभारल्यास वाहनांचा वेग कमी करण्यास मदत होईल. तसेच वाहतूक पोलिसांनी सातत्याने या महामार्गावर लक्ष ठेवल्यास अपघात टळू शकतात. तसेच रस्त्यावरील खड्डे तात्काळ बुजविण्याची मागणी वाहनधारकांमधून होत आहे.
