मुंबई : प्रतिनिधी
खाजगी रुग्णालयात रिसेप्शनिस्ट म्हणून काम करणा-या मराठी तरुणीला बेदम मारहाण करण्यात आल्याचा भयानक प्रकार उघडकीस आला आहे, कल्याणच्या नांदिवली परिसरातील एका क्लिनिकमध्ये ही धक्कादायक घटना घडली. एका परप्रांतीय तरुणाने रिसेप्शनिस्ट म्हणून काम करणा-या तरुणीला आतमध्ये घुसून लाथा-बुक्क्यांनी तुडवत बेदम मारहाण केली आहे. ही संपूर्ण घटना तेथील सीसीटीव्हीमध्ये कैद झाली असून त्यामध्ये त्या मारहाणीची भीषणता दिसून येते.
डॉक्टरांकडे एमआर बसले आहेत, तुम्ही जरा थांबा, इतकंच ही तरुणी बोलली होती, मात्र ते ऐकल्यांतर तो तरुण तिरीमिरीने आता शिरला आणि काहीही विचार न करता त्याने त्या तरुणीला मारायला सुरुवात केली. याप्रकरणी मानपाडा पोलिस स्टेशनमध्ये गुन्हा दाखल झाला आहे. मात्र यामुळे राज्यात कित्येक दिवसांपासून सुरू असलेला मराठी विरुद्ध अमराठी हा वाद पुन्हा पेटण्याची चिन्हे असून वाद आणखी चिघळू शकतो.
कल्याणच्या नांदिवली परिसरात एका खासगी रुग्णालयात पीडित तरुणी ही रिसेप्शनिस्ट म्हणून काम करते. तेथे डॉक्टरांना भेटण्यासाठी गोपाळ झा नावाचा परप्रांतीय इसम आला होता. मात्र डॉक्टरांच्या केबिनमध्ये आधीच कोणीतरी बसले होते, त्यामुळे त्या मराठी रिसेप्शनिस्ट तरुणीने समोर आलेल्या त्या इसमाला थोडे थांबण्यास सांगितले.
पण ते ऐकल्यावर गोपाळ झा याने त्या रिसेप्शनिस्ट तरुणीशी वाद घालायला सुरुवात केली. एवढंच नव्हे तर ती तरुणी त्याच्याशी बोलत असताना हा इसम तावातावाने पुढे आला आणि त्या तरुणीच्या अंगावर धावून गेला. आधी त्याने तिला लाथ मारली, त्यामुळे ती तरुणी खाली पडली. नंतर त्याने तिच्या केसांना धरून तिला फरफटत ओढले आणि लाथा-बुक्क्यांनी अमानुषपणे मारहाणही केली.
ते पाहून क्लिनिकमध्ये उपस्थित असलेल्या इतर लोकांनी त्या इसमाला रोखण्याचा आणि त्या तरुणीला वाचवण्याचा प्रयत्न केला. मात्र या संपूर्ण घटनेत त्या तरुणीला बराच मार लागला असून ती चांगलीच जखमी देखील झाली आहे. ही दुर्दैवी घटना तेथील सीसीटीव्ही कॅमे-यात कैद झाली आहे. याप्रकरणी मानपाडा पोलिस स्टेशनमध्ये गुन्हा दाखल करण्यात आला असून या घटनेनंतर फरार झालेला आरोपी गोपाळ याचा पोलिसांकडून कसून शोध घेतला जात आहे.
