शिरूर अनंतपाळ : प्रतिनिधी
तालुक्यातील साकोळ येथे क्रिडापट्टू गणेश रामशेटे यांच्या स्मरणार्थ आयोजित करण्यात आलेल्या टेनिस बॉल क्रिकेट स्पर्धेस खेळाडू व क्रिकेटप्रेमींचा उत्स्फूर्त प्रतिसाद लाभला. या स्पर्धेत परिसरातील तब्बल २० संघांनी सहभाग नोंदवत उत्कृष्ट खेळाचे प्रदर्शन केले. स्पर्धेतील सर्व सामने अत्यंत चुरशीचे व रोमांचक झाले. अंतिम सामन्यात सुरजदादा क्रिकेट क्लब कारेवाडी संघाने दमदार कामगिरी करीत विजेतेपद पटकावले, तर यजमान इंडियन आर्मी क्रिकेट क्लब साकोळ संघाने उपविजेतेपद मिळविले.
दोन्ही संघांमधील अंतिम सामना शेवटपर्यंत रंगतदार झाला. कारेवाडी संघाच्या खेळाडूंनी फलंदाजी, गोलंदाजी आणि क्षेत्ररक्षण या तिन्ही विभागांत सरस कामगिरी करीत १० गडी राखून दणदणीत विजय मिळवला. स्पर्धेदरम्यान उत्कृष्ट खेळ करणा-या खेळाडूंना विशेष पारितोषिके देऊन गौरविण्यात आले. विजेत्या व उपविजेत्या संघांना मान्यवरांच्या हस्ते चषक व रोख बक्षिसे प्रदान करण्यात आली. स्पर्धेला परिसरातील नागरिक, युवक आणि क्रिकेटप्रेमी मोठ्या संख्येने उपस्थित होते. या स्पर्धेमुळे ग्रामीण भागातील खेळाडूंना आपली गुणवत्ता दाखविण्याची संधी मिळाल्याची भावना उपस्थितांनी व्यक्त केली. क्रिडापट्टू व क्रिकेटप्रेमीसाठी पर्वणी ठरलेल्या सात दिवस चाललेल्या या स्पर्धेच्या यशस्वी आयोजनासाठी आयोजक संकेत जाधव, करण शिंदे, अंबादास मादळे, विक्रांत शिंदे, मंडळाचे पदाधिकारी, सदस्य व खेळाडूंनी परिश्रम घेतले.
