नांदेड : प्रतिनिधी
ग्रामीण पोलीस ठाण्याच्या गुन्हेशोध पथकाने दुचाकी चोरीच्या गुन्ह्याचा यशस्वी छडा लावत एका आरोपीला अटक केली.त्याच्याकडून ३ चोरीच्या दुचाकी जप्त केल्या आहेत. या कारवाईत सुमारे १ लाख २० हजार रुपयांचा मुद्देमाल हस्तगत करण्यात आला आहे.
पोलीस अधीक्षक डॉ. नीलाभ रोहन यांच्या मार्गदर्शनाखाली नांदेड ग्रामीण पोलीस ठाण्याच्या दुचाकी चोरीच्या गुन्ह्याचा तपास सुरू असताना गुन्हेशोध पथकाला गोपनीय माहिती मिळाली. त्यानुसार मनोज दिनकर सदार ( रा. पंचशील बुद्ध विहारजवळ, हडको) याला ताब्यात घेऊन चौकशी करण्यात आली. चौकशीत त्याने दुचाकी चोरीची कबुली दिली.
आरोपीकडून चोरीस गेलेली दुचाकी जप्त करण्यात आली . पुढील तपासात आरोपीच्या घरातून आणखी २ दुचाकी आढळून आल्या. त्या वाहनांबाबत संबंधित पोलीस ठाण्यांकडे चोरीचे गुन्हे दाखल आहेत का? याची पडताळणी सुरू असून त्यानुसार पुढील कायदेशीर कारवाई करण्यात येत आहे.
ही उल्लेखनीय कारवाई पोलीस अधीक्षक डॉ. नीलाभ रोहन यांच्या मार्गदर्शनाखाली पोलीस उपनिरीक्षक बाबुराव चव्हाण, पोलीस अंमलदार जाधव तसेच ग्रामीण पोलीस ठाण्याच्या गुन्हेशोध पथकाने केली.
यावेळी पोलिसांनी नागरिकांना वाहन सुरक्षित ठिकाणी उभे करण्याचे, दुहेरी लॉकचा वापर करण्याचे तसेच परिसरात संशयास्पद हालचाली आढळल्यास तात्काळ जवळच्या पोलीस ठाण्याशी संपर्क साधण्याचे आवाहन केले आहे.
