नांदेड : प्रतिनिधी
सोशल मीडियावर फोटो व व्हिडिओ व्हायरल करण्याची तसेच खोट्या बलात्काराच्या गुन्ह्यात अडकविण्याची धमकी देऊन एका व्यक्तीकडून १ लाख रुपयांची खंडणी उकळण्याचा प्रयत्न करणा-या टोळीचा भाग्यनगर पोलिसांनी अवघ्या काही तासांत पदार्फाश केला. या प्रकरणात ४ महिलांसह ५ आरोपींना अटक करण्यात आली आहे. त्यांच्याकडून गुन्ह्यात वापरलेली वाहने, मोबाईल फोन आणि सोन्याची अंगठी असा सुमारे ५.५० लाखांचा मुद्देमाल जप्त करण्यात आला आहे.
पोलीसांनी दिलेल्या माहितीनुसार, ३१ जुलै रोजी एका महिलेने एका व्यक्तीला मोबाईलवर संपर्क साधून ड्रायव्हरची आवश्यकता असल्याचे सांगून भाग्यनगर परिसरातील बेलानगर येथे बोलावले. फियार्दी घटनास्थळी पोहोचताच तेथे उपस्थित असलेल्या ४ महिलांनी व एका पुरुषाने त्यांना जबरदस्तीने एका घरात नेले. त्यानंतर त्यांच्या अंगावरील शर्ट काढून बनियनवरील अवस्थेत फोटो व व्हिडिओ मोबाईलद्वारे चित्रित करण्यात आले. हे फोटो व व्हिडिओ सोशल मीडियावर व्हायरल करण्याची तसेच खोट्या गुन्ह्यात अडकविण्याची धमकी देत १ लाखांची खंडणी मागण्यात आली.
आरोपींनी फियार्दीच्या हातातील सुमारे ८ ग्रॅम वजनाची १.२० लाख किंमतीची सोन्याची अंगठी जबरदस्तीने काढून घेतली व तेथून पसार झाले.घटनेनंतर फियार्दीने भाग्यनगर पोलीस ठाण्यात तक्रार दाखल केली. त्यानुसार गुन्हा दाखल करण्यात आला. पोलीस अधीक्षक डॉ. नीलाभ रोहन यांच्या आदेशानुसार आणि वरिष्ठ अधिका-यांच्या मार्गदर्शनाखाली गुन्हेशोध पथकाने तांत्रिक माहिती, गुप्त बातमीदार व स्थानिक माहितीच्या आधारे आरोपींचा शोध घेऊन अल्पावधीतच आरोपी शिला सुनील भदरगे (रा. बेला नगर ), इंदुबाई विठ्ठलराव बा-हाटे (रा. संतोष नगर ), सुनिता रमाकांत सोनकांबळे (रा. सप्तगिरी कॉलनी ), रेखा रामचंद्र इंगोले (रा. देगाव चाळ) व अमन मारुती कांबळे (रा. पाली नगर) यांना अटक केली.
अटक करण्यात आलेल्या आरोपींकडून २ स्कुटी, १ ऑटो , ४ मोबाईल फोन तसेच सोन्याची अंगठी असा एकूण ५.५० लाखांचा मुद्देमाल जप्त करण्यात आला आहे. ही कारवाई भाग्यनगर पोलीस ठाण्याचे पोलीस निरीक्षक संतोष तांबे, महेश माळी, पोलीस उपनिरीक्षक विनोद देशमुख, नरेश वाडेवाले यांच्या पथकाने केली.
