पटेल गैरहजर, राष्ट्रवादीतील धुसफूस उघड
मुंबई : प्रतिनिधी
अजितदादांच्या निधनानंतर राष्ट्रवादी कॉंग्रेस पक्षातील वरिष्ठ नेत्यांची पक्षातील नाराजी वाढत चालली आहे. पक्षाच्या अध्यक्षा सुनेत्रा पवार आणि पार्थ पवार या माय-लेकांनी घेतलेल्या काही निर्णयांनी पक्षातील वरिष्ठ नेते नाराज असल्याची माहिती पुढे येत असताना आज राष्ट्रवादी पक्षाच्या महत्वाच्या बैठकीला वरिष्ठ नेते प्रफुल्ल पटेल गैरहजर राहिले. यावेळी तटकरे यांनी आमच्यावर टीका होत असताना पक्षातील कोणतेही नेते आमच्या मदतीला आले नाहीत, अशा शब्दांत मनातील खदखद बोलून दाखविली. त्यावेळी तटकरे, भुजबळ यांच्यात खडाजंगी झाल्याचे वृत्त आहे.
राष्ट्रवादी काँग्रेसच्या आजी, माजी आमदारांची महत्वाची बैठक पक्षाध्यक्ष सुनेत्रा पवार यांच्या अध्यक्षतेखाली देवगिरी बंगल्यावर आज आयोजित करण्यात आली होती. पक्षाचे विधानसभेचे आणि विधान परिषदेचे आमदार या बैठकीला हजर होते. मात्र, मुंबईत असूनही प्रफुल्ल पटेल बैठकीला गैरहजर राहिले. यावेळी तटकरे यांनी आपल्यावर आणि प्रफुल्ल पटेल या ज्येष्ठ नेत्यांवर आणि पक्षावर टीका होत असताना पक्षातील इतर कोणताही नेता किंवा नेतृत्व आमचे समर्थन करत नसल्याची खंत व्यक्त केली.
प्रफुल्ल पटेल पक्षाचे राष्ट्रीय कार्याध्यक्ष आहेत. पण ते गैरहजर राहिले. त्यातच ज्येष्ठ नेत्यांना डावलेले जात असल्याची पक्षातील दुस-या फळीतील नेत्यांची भावना आहे. या घडामोडीमुळे शरद पवार यांना भेटण्यासाठी काही आमदार आणि तटकरे गेल्याने पक्षात गोंधळाची स्थिती आहे.
आम्ही दोघेच टीकेचे धनी का?
दादांच्या निधनानंतर आम्ही पक्ष वाढवत असताना आम्ही दोघेच टिकेचे धनी का, असा सवाल तटकरे यांनी केला. या मुद्यावर छगन भुजबळांनी आक्षेप घेतला. जे झाले ते झाले, ते सोडून द्या, आता पुढे जाऊया, असा सल्ला दिला. त्यावरून दोघांत खडाजंगी झाल्याचे समजते. याचवेळी तटकरे यांचे भाषण सुरू होण्यापूर्वीच पार्थ पवार बैठकीतून निघून गेल्याचे समजते.
