आज दिल्लीत बैठक, पत्रकारांच्या प्रश्नावर शिंदे भडकले
मुंबई : प्रतिनिधी
विधानपरिषदेच्या जागावाटपाचा तिढा सोडण्यासाठी आज मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांची अर्धा तास बैठक होऊनही मार्ग निघाला नाही. भाजपने खूपच ताणून धरल्याने शिंदे अस्वस्थ झाले असून पत्रकारांनी विधानपरिषदेबाबत विचारता ते चांगलेच संतापल्याचे दिसून आले. दरम्यान यासंबंधी तोडगा काढण्यासाठी उद्या बुधवारी राजधानी दिल्लीत बैठक होणार आहे.
स्थानिक स्वराज्य संस्थांमधून विधानपरिषदेवर पाठवण्यात येणा-या १७ जागांची निवडणूक होत आहे. या १७ पैकी १४ जागांवर भाजपने दावा सांगितला असून शिवसेनेला दोन व राष्ट्रवादीला एक जागा सोडण्याची तयारी दर्शवली आहे. यामुळे शिंदे वैतागले आहेत. त्यांनी पाच जागांसाठी आग्रह धरला आहे. शिंदेंची शिवसेना ठाणे, नाशिक, छत्रपती संभाजीनगर, रायगड, हिंगोली-परभणी या जागांसाठी आग्रही आहे तर राष्ट्रवादी काँग्रेस रायगडच्या जागेसाठी आग्रही आहे. त्यामुळे अनेकदा बैठका होऊनही महायुतीच्या जागांचा तिढा कायम होता. आजही यावर कोणताही तोडगा निघाला नाही. कांद्याच्या प्रश्नासाठी उद्या दिल्लीत गृहमंत्री अमित शाह यांच्याकडे बैठक होणार आहे.
भाजपच्या यादीवर
दिल्लीत होणार चर्चा
विधान परिषदेच्या उमेदवार निश्चितीसाठी भाजपात हालचालींना वेग आला असून भाजपा प्रदेशाध्यक्ष रवींद्र चव्हाण आज दिल्लीला रवाना झाले. विधान परिषदेच्या एकूण १२ जागांसाठी ४८ जणांच्या नावांची यादी तयार केली आहे. दिल्ली दौ-यात भाजपचे राष्ट्रीय अध्यक्ष नितीन नबिन तथा केंद्रीय गृहमंत्री अमित शहांची भेट घेऊन रविंद्र चव्हाण चर्चा करणार आहेत. त्यामुळे पुढील २ ते ३ दिवसांत भाजप उमेदवारांच्या नावावर शिक्कामोर्तब होण्याची शक्यता आहे.
